O 21 de xuño celébrase o Día Mundial da  ELA. Con motivo deste día, a Asociación Galega de Esclerose Lateral  Amiotrófica –  AGAELA, en colaboración coa Confederación Nacional de Entidades de  ELA (ConELA), lanzaron a Campaña # LuzporlaELA, na que edificios e monumentos de toda España iluminaranse de verde co obxectivo de visibilizar a enfermidade e apoiar ás persoas enfermas para concienciar á sociedade sobre as dificultades que ocasionan no día a día. En 2021 uníronse 256 concellos de toda España iluminando 345 monumentos emblemáticos, e a nivel internacional sumáronse Colombia e Panamá.

O Concello de Ames, a través da Concellaría de Benestar Social, súmase a esta iniciativa iluminando a fachada da Casa do Concello de cor verde este martes 21 de xuño.

En Galicia iluminaranse de verde máis de 72 edificios, entre os que se atopan: o Edificio Administrativo de San Caetano e a Cidade da Cultura de Galicia, a Subdelegación do Goberno de Ourense e Lugo, os edificios das Deputacións da Coruña, Ourense, Pontevedra e Lugo; a Torre de Hércules, o Hospital e a Fundación San Rafael, entre moitos outros que se poden consultar na web de  AGAELA.

Convidámosvos a todos e a todas a fotografar os edificios e monumentos das vosas cidades iluminados de verde e a difundilo nas redes sociais coa etiqueta #LuzporlaELA2022.

Sobre a ELA
A  ELA é unha enfermidade  neurodexenerativa incurable, progresivamente incapacitante e mortal nun prazo de 3 a 5 anos desde o seu diagnóstico, pero isto só son datos obxectivos da enfermidade. A realidade é que, en España, cada día, diagnostícanse tres novos casos de Esclerose Lateral  Amiotrófica e falecen outras tres persoas en silencio.

A isto hai que sumarlle o custo medio dos coidados das persoas con ELA que alcanza cifras moi elevadas anualmente, o que supón un problema económico inasumible para a maioría das familias. A dificultade de detectar os síntomas iniciais a nivel de atención primaria e a complexidade do diagnóstico diferencial demoran o diagnóstico da ELA. En España, o tempo medio desde o primeiro síntoma definitivo ata o diagnóstico supera o ano.

Por iso, é importante potenciar a innovación e a tecnoloxía. Do mesmo xeito que é vital apoiar e fomentar a investigación, que nos permitirá atopar a orixe, o diagnóstico rápido e a cura desta enfermidade. Así como, alcanzar a maior eficacia relacionada cunha organización asistencial adecuada ás necesidades dos pacientes, garantindo, desta maneira, os coidados que asegurar unha calidade de vida digna, independentemente do lugar onde residan.

As organizacións e asociacións de persoas con ELA suman esforzos para visibilizar a realidade desta enfermidade, creando un manifesto onde se escoite e atendan as necesidades e coidados que necesitan, xa non só as persoas con ELA, senón tamén as da súa contorna e familia.

Novas relacionadas:

El Correo Gallego: "Conmemoran o día da ELA na Maía e en 12 municipios"