Mañá domingo, 14 de xuño, celébrase o Día Nacional das Linguas de Signos. Por iso, a fachada da Casa do Concello de Ames iluminarase en cor turquesa para a súa conmemoración. O lema deste ano é “libres para elixir, libres para  signar” como prioridade para asegurar que os nenas e nenos con discapacidade auditiva crezan de forma libre e plena.

A esta conmemoración súmase a colaboración que xa existe entre a Federación de Persoas Xordas, a Asociación de Persoas Xordas de Santiago e o Concello de Ames, coa realización dende fai anos de cursos gratuítos de iniciación á lingua de signos, cos que se acredita aos asistentes cunha titulación de A1.

Cabe destacar que a nivel global existen diversas linguas de signos posto que, como se indica dende a CNSE, estas foron evolucionando de forma natural co contacto entre persoas ata converterse en “linguas naturais de carácter visual, espacial, xestual e manual en cuxa conformación interveñen factores históricos, culturais, lingüísticos y sociais”. Así, mediante cursos como o realizado en Ames, búscase estender o uso deste tipo de linguaxe co obxectivo de romper as barreiras coas persoas xordas, mellorando a interacción social e comunicativa coas oíntes.

Día Nacional das Linguas de Signos Españolas
O Día Nacional das Linguas de Signos Españolas celebrase o 14 de xuño, xa que nesa mesma data no ano 1936 constituíase a CNSE (Confederación Estatal de Persoas Xordas), principal axente catalizador, xunto coas súas federacións e asociacións, de aquelas iniciativas orientadas á conquista dos dereitos das persoas usuarias da lingua de signos española.

Trátase dunha oportunidade para difundir unha imaxe positiva das linguas de signos e por tanto, das persoas xordas e xordo-cegas. Asemade, esta conmemoración sirve para recordar a todos os estamentos que conforman a nosa sociedade que as linguas de signos en España cumpren un papel fundamental para a transmisión de ideas, a relación persoal e social e o intercambio de coñecemento.

Novas relacionadas:

El Correo Gallego: "Iluminarán o consistorio de turquesa para celebrar o Día Nacional da Lingua de signos"