Está mañá presentouse na Casa do Concello, en Bertamiráns, o programa de campamentos de verán 2025, dirixido á rapazada que estea cursando os niveis de primaria, secundaria e bacharelato. No acto de presentación participaron o concelleiro de Xestión do Medio Natural, Javier Antelo; a concelleira de Planificación e Xestión Educativa e Mocidade, Carmen Porto; a técnica de Medio Ambiente e coordinadora da Aula da Natureza, Patricia Reboreda; e a técnica de Mocidade, Pili Villaverde. Ademais, en dito programa colabora a Concellaría de Benestar Social, xa que existen prazas para persoas con algún tipo de discapacidade e para casos  de emerxencia social.

Os campamentos de verán son unha oferta lúdica e formativa de desenvolvemento persoal concibida para, de xeito progresivo, dotar a nenos/as e mozos/as das ferramentas precisas para lograr a súa autonomía e independencia fomentando a convivencia, a cooperación, o respecto e un xeito de vida saudable ao tempo que proporcionar un achegamento ao medio natural, ao deporte e a cultura.

Presentación do programa
O concelleiro de Xestión do Medio Natural, Javier Antelo, destacou que “grazas a este programa de campamentos todos os anos moitos rapaces e rapazas poden acudir a distintos campamentos da xeografía galega. O obxectivo é achegar á rapazada á natureza e fomentar a convivencia e cooperación entre eles”.

A concelleira de Planificación e Xestión Educativa e Mocidade, Carmen Porto, explicou que “todos os anos tratamos de seguir mantendo, e mellorar, se é posible, a calidade deste programa municipal. Estes campamentos permítenlle aos nenos e nenas poder socializar e coñecer outros lugares fóra do noso concello”.

Por outro lado, a técnica da Aula da Natureza, Patricia Reboreda, subliñou que “dende hai uns anos inténtase, na medida en que o Concello pode, ser inclusivos polo que en todos os campamentos hai unhas prazas reservadas para persoas con diversidade, coordinado coa concellaría de Benestar Social”.

A técnica de Mocidade, Pilar Villaverde, explicou os campamentos organizados desde o seu departamento, orientados á mocidade dos cursos da ESO e bacharelato; “dende o noso departamento ofertamos tres opcións para os mozos e mozas de Ames, que cursan secundaria e bacharelato. Estes campamentos desenvolveranse en Portonovo, Oia e O Grove, do 29 de xuño ao 17 de xullo”.  

6 campamentos para o alumnado de primaria
Os/as rapaces e rapazas de primeiro de educación primaria poderán acudir do 1 ao 3 de xullo á Granxa escola Bergando, en Negreira. Para este campamento ofértanse 40 prazas e o prezo é de 100 euros. Para o alumnado de segundo de educación primaria ofrécese o campamento Corazón de Carballo, en Tomiño, dende o 21 ao 23 de xullo. Neste caso tamén se ofrecen 40 prazas por un prezo 100 euros/persoa.

Os rapaces e rapazas de terceiro de educación primaria poderán ir á Granxa Escola El Kiriko, en Fornelos de Montes, do 21 ao 24 de xullo. Ofrécense 40 prazas por un prezo de 135 euros por cada praza. Para a rapazada de cuarto de educación primaria programouse a estadía no campamento de Fervenzaventura, en Silleda, do 7 ao 11 de xullo. Dispoñen de 45 prazas cun prezo de 135 euros/persoa.

Para os rapaces e rapazas de quinto de primaria está dirixido o campamento de Muíño, en Narón, do 25 ao 30 de xuño. Neste caso ofértanse 50 prazas cun prezo de 180 euros/praza. Por último, a rapazada de sexto de primaria poderá acudir ao campamento Mar de Oleiros do 25 ao 30 de xuño. Para este campamento hai 60 prazas a un prezo de 180/persoa.

3 campamentos para a mocidade de secundaria e bacharelato
Por outra banda, para a mocidade de primeiro da ESO está dirixido o campamento de Abrente, en Portonovo, do 11 ao 17 de xullo. Para este campamento hai 35 prazas que contan cun o prezo de 230 euros/praza. O alumnado de segundo da ESO poderá acudir ao campamento de Mougás, en Oia, que se desenvolverá do 29 de xuño ao 5 de xullo. Para este campamento tamén se ofertan 35 prazas a un prezo de 230 euros/persoa. Para a mocidade de terceiro da ESO e bacharelato está programado o campamento Paisaxe II, no Grove, do 7 ao 13 de xullo. Neste caso ofértanse 45 prazas, que contan cun prezo de 230 euros/praza.

Campamento na Aula da Natureza
Ademais, a Aula da Natureza do Concello de Ames organiza dúas quendas para o seu campamento urbano, que está dirixido a rapaces e rapazas de 6 a 16 anos. A primeira quenda realizarase do 1 ao 11 de xullo, mentres que a segunda quenda será do 14 ao 22 de xullo. Ofértanse 25 prazas por quenda e levaranse a cabo de luns a venres, en horario de 11:00 a 17:30 horas. O prezo é de 60 euros.

Solicitude de praza
A solicitude de praza farase presentando a ficha de solicitude a través do rexistro telemático na Sede electrónica do Concello ou nos rexistros de calquera administración pública adherida á plataforma de intercambio rexistral (SIR). O código de solicitude corresponderase co número de rexistro de entrada. No caso de ser preciso a adxudicación de prazas mediante sorteo público, asignaráselle un número de participación que será publicado nas listas definitivas. O sorteo, de ser necesario, farase a  través dunha aplicación informática.

O 10% das prazas están reservadas para o departamento de Servizos Sociais para casos de emerxencia social. Ademais, existen prazas para persoas con algún tipo de discapacidade. Os usuarios/as con discapacidade igual o superior ao 33%, de ser preciso, contarán con monitorado de apoio específico. Este monitorado non realizará tarefas sanitarias agás aquelas relacionadas coa autonomía persoal.

Novas relacionadas:

La Voz de Galicia: "Ames oferta este año 440 plazas en los campamentos de verano"

El Correo Gallego: "Ames anticipa o verán e anuncia 440 prazas nos campamentos municipais"