Xunto coa documentación do borrador tamén se lle deu traslado da convocatoria de xuntanzas aos representantes das tres formacións políticas, Ames Novo, Ciudadanos e Partido Popular, que se desenvolveron o luns 13 de xaneiro e mailo martes 14 xaneiro.

A estas xuntanzas asistiron os voceiros/as das tres formacións políticas que conforman o goberno de Ames (PSdeG, BNG e Contigo Podemos), que actuaron en nome do goberno municipal e os representantes de Ames Novo e Ciudadanos, así como o voceiro do Partido Popular acompañado de dúas concelleiras do mesmo grupo.

Nesta primeira toma de contacto, desde o goberno expuxéronse as grandes cifras do orzamento que superará os 27.000.000 euros e as grandes liñas polas que aposta este goberno municipal nestes orzamentos, salientando a ampliación e mellora de servizos e infraestruturas no rural, así como a implantación dun Plan de mantemento dos núcleos do rural.

Tamén se aposta polo reforzo e ampliación dos servizos sociais, a mellora dos servizos e infraestruturas ligadas á área de educación, a ampliación dos espazos deportivos, o reforzo do proceso e impulso dos investimentos ligados ao Plan Impulsa Ames, que se enmarca dentro da Estratexia de Desenvolvemento Urbano Sostible (EDUSI).

O goberno segue a traballar no borrador de Orzamentos 2020, pois é unha necesidade e prioridade para o Concello de Ames poder consensuar uns orzamentos para este exercicio e poder telos aprobados nas vindeiras semanas.

Novas relacionadas:

El Correo Gallego: "Ames presentará uns orzamentos de máis de 27 millóns este ano"

La Voz de Galicia: "El tripartito de Ames aborda los presupuestos con la oposición"

Compostela 24 horas: "O goberno municipal inicia as conversas para a aprobación do Orzamento Municipal 2020"