A Concellaría de Educación inicia desta forma a reutilización da nave de obras situada na avenida da Maía, en Bertamiráns, para acoller este módulo que supón centralizar a limpeza da menaxe dos sete comedores escolares nunha primeira fase no ano 2022, para logo abordar a centralización das dúas cociñas situadas actualmente no CEIP Agro do Muíño e na EEI do Milladoiro no ano 2023.

O pasado venres, 21 de xaneiro, o persoal do estudo Obradoiro Enxeñeiros realizou unha presentación do proxecto da central de lavado dos comedores escolares de Ames. A dita presentación acudiron o alcalde de Ames, Blas García, o concelleiro de Educación, David Santomil, a concelleira de Economía e Facenda, Genma Otero, a técnica municipal do departamento de Educación, Rosa Isabel García, e maila aparelladora municipal, Margarita Iglesias.

Dito proxecto executarase en dúas partes. Primeiro construirase a área de lavado que disporá dunha superficie de 196 metros cadrados. Esta zona está composta por unha zona de lavado, outra zona de entrada de sucio e suministros, un almacén para carros, un local de limpeza e lixo, e un local para máquinas. Na segunda fase do proxecto construirase a área da cociña central que terá unha superficie total de 888 metros cadrados, incluída a área de lavado. Disporá dunha área de cociña xeral e outra cociña específica para intolerancias, unha zona de frío para a elaboración de primeiros pratos, postres e pan; distintos almacéns; e cámaras frigoríficas; así como varias cámaras para a conservación do produto final; e dous vestiarios (feminino e masculino).

O concelleiro de Educación e Axenda Urbana, David Santomil, participou na presentación e visitou cos técnicos a nave onde estará ubicada a central de lavado. “Avanzamos na centralización dos servizos municipais cunha primeira fase na que instalaremos un módulo de lavado de menaxe, para logo trasladar as cociñas e dispor dun espazo único para o traballo do persoal e a elaboración dos menús que transportaremos aos diferentes centros escolares”, explicou Santomil.

O concelleiro de Educación engade “as actuais dimensións da rede de comedores escolares municipais, con sete centros escolares e a construción dun novo colexio no Milladoiro require unha reorganización necesaria para seguir a garantir a calidade e o funcionamento da rede”.

O alcalde, Blas García, destaca “este é un investimento de importancia porque vai a garantir a calidade dos comedores escolares, xa que mellora e centraliza as instalacións existentes ata o de agora. Comezamos co centro de lavado para continuar coa construción dunha cociña única que centralice toda a elaboración dos menús, o que é un gran avance ademais de significar un aforro no funcionamento dos comedores”.

Novas relacionadas

La Voz de Galicia: "Ames centralizará la cocina y el lavado de loza de los comedores"

El Correo Gallego: "Ya hay un proyecto para construir la central de lavado de los comedores"

Lindeiros: "Ames unificará a cociña dos comedores e a limpeza da louza"