- Tematica
O vindeiro venres, 14 de xuño, o grupo municipal de teatro pechará a súa actividade co segundo pase da obra “A visita”, na Casa da Cultura de Bertamiráns. O convites están dispoñibles na Billeteira electrónica do Concello. O primeiro pase tivo lugar o pasado 7 de xuño, na Casa da Cultura do Milladoiro. Ademais, a Escola Municipal de Teatro de Ames celebrará a vindeira semana diversas mostras de fin de curso dos grupos infantís e xuvenil. Desde o departamento de Cultura informan de que o prazo de matrícula para o vindeiro curso abrirá a mediados deste mes.
A Escola Municipal de Teatro, posta en marcha no ano 2021 pola Concellaría de Cultura e na que actualmente participan arredor de 90 persoas, clausurará esta semana o seu terceiro curso en funcionamento.
Segundo pase da obra do grupo municipal de teatro
O grupo municipal de teatro integrado por adultos, representará o 14 de xuño na Casa da Cultura de Bertamiráns un segundo pase da obra “A visita”. O primeiro pase tivo lugar o pasado 7 de xuño, na Casa da Cultura do Milladoiro.
O elenco estará composto por Mirella Vázquez, Emilia Mayo, Anna Reig, Cris Botrán, Rosana González, Marichelo Cajide, Ilduara García, Pablo Núñez, Gene Martínez, Pablo Otero, Marisa Peña, Esteban Paz e Carmela Pardal.
Esta peza de Friedrich Dürrenmatt desenvólvese en Güllen, unha cidade que leva anos asolada pola miseria e a pobreza; coas fábricas e a industria pechadas, aos güllenses só lles queda vivir do recordo de épocas mellores. Porén, a volta ao fogar dunha antiga veciña, a millonaria Clara Zachanassian, enche de esperanza os corazóns de toda a poboación. Clara marchou da vila cando nova, e fixo unha fortuna no estranxeiro, converténdose nunha das persoas máis ricas do mundo. O destino de Güllen depende da súa visita.
Clausura dos grupos de rapaces/as da Escola Municipal de Teatro
O martes día 18, o alumnado máis novo da escola trasladarase á Casa da Cultura de Bertamiráns. Ás 17:30 horas será a quenda do grupo infantil, con nenos e nenas de entre 3 e 6 anos, que abrirá a representación con “Contemos un conto”. O segundo grupo infantil, no que participa rapazada de entre 7 e 11 anos, interpretará “O bosque dos mil perdidos” ás 20:00 horas. Pechará a xornada o grupo xuvenil de maiores de 12 anos, con “Mórdeme”, ás 20:30 horas.
Ao día seguinte, o mércores 19, a Escola Municipal de Teatro chegará á Casa da Cultura do Milladoiro co grupo infantil de 3 a 6 anos, que novamente representará “Contemos un conto”, ás 17:30 horas; e co grupo infantil de 7 a 11 anos coa obra “O reino do derroche”, ás 20:00 horas. Xa ás 20:30 horas será a quenda do grupo xuvenil de maiores de 12 anos, que pechará a mostra coa representación de “Criaturiñas”.
Novas relacionadas:
Ames Go: "Novo pase da obra da escola municipal de teatro, A Visita, o venres 14 na CC de Bertamiráns"
