O campo magnético da regueifa continúa a estenderse entre a mocidade a través dos obradoiros de improvisación oral organizados no marco da oitava edición do Enreguéifate. A partir do vindeiro martes, 10 de decembro, serán os centros escolares do concello de Ames os que se deixen atraer polo seu magnetismo. Ata o 19 de decembro, participarán nesta iniciativa o IES Plurilingüe de Ames, o IES do Milladoiro, o CEIP A Maía, o CEIP de Ventín e o CEIP Agro do Muíño. Serán un total de trece obradoiros, dirixidos a alumnado de 5º e 6º de primaria e do primeiro ciclo ESO, impartidos por Lupe Blanco e Josinho da Teixeira.

O obxectivo principal destes obradoiros é poñer en valor a regueifa, incentivar a súa práctica e difundila entre a infancia e a mocidade. Esta formación para escolares é unha das accións principais do Enreguéifate, o proxecto impulsado polos servizos de normalización lingüística dos concellos de Ames, Carballo, Pontevedra, Santiago de Compostela e Teo, encamiñado a promover a improvisación oral de xéneros galegos de improvisación oral en verso, para contribuír á vez á promoción do uso da lingua galega.

En paralelo ás actividades formativas, o Enreguéifate organiza un certame de regueifas en vídeo. O prazo de participación estará aberto do 20 de xaneiro ao 20 de marzo de 2025 e a inscrición poderá facerse dende a páxina web do certame, onde xa están dispoñibles as bases.

Co lema Enreguéifate, puro magnetismo!, esta oitava edición volverá contar con dúas categorías: xeral e escolar. Como novidade, este ano amplíanse de seis a oito os premios por cada unha delas. Así, amais dos xa tradicionais regueipremios para a regueifa máis brava, máis aguda, máis diversa, máis reivindicativa, mellor cantada e mellor falada, este ano tamén haberá galardóns para a regueifa máis inclusiva e a máis entroideira. Os galardóns entregaranse no mes de maio nunha gala que este ano volverá ser un fin de festa conxunto dos proxectos Enreguéifate e Regueifesta.