En virtude desta moción, acordouse modificar a composición destes órganos, quedando con esta representación: 2 representantes do grupo municipal popular (incluído o presidente), 2 representantes do grupo municipal socialista e 3 concelleiros non adscritos.

A moción sobre as comisións informativas tamén inclúe o acordo de que os concelleiros/as non adscritos teñen un prazo de 10 días naturais desde a aprobación desta nova composición para nomear e comunicar os seus representantes. Finalmente, a proposta acordada foi a mesma presentada no seu día polo grupo de Goberno en canto ao número de representantes dos grupos municipais e dos concelleiros non adscritos.

Na súa intervención, o alcalde de Ames, Santiago Amor, explicou que tras a proposta presentada polo Goberno o pasado mes de abril e do informe emitido pola Deputación da Coruña, esta semana mantívose unha reunión na que estiveron presentes representantes dos diferentes grupos municipais e dos concelleiros non adscritos. O rexedor destacou que neste encontro, “propúxose unha solución á composición das comisións informativas e acadouse o compromiso de fixar unha reunión para a vindeira semana de cara a iniciar os traballos para elaborar o regulamento de organización de pleno, así como de participación veciñal”.

Saneamento e abastecemento
Ademais de aprobar a nova composición das comisións, o pleno tamén deu luz verde ao procedemento aberto con varios criterios de adxudicación para o contrato de abastecemento e saneamento do Concello de Ames para os próximos 15 anos. Durante a sesión plenaria, a concelleira de Medio Ambiente, María Eugenia Martín, explicou que desde xullo de 2011 fíxose un seguimento do servizo e comezouse o estudo do contrato da concesión, datado de 1998. Unha vez recabada esa información, creouse unha comisión de técnicos que requiriu información de maior complexidade para a elaboración do prego técnico. Seguidamente, púxose en marcha unha comisión con representantes políticos e, durante estes meses, traballouse na redacción dos pregos técnicos e administrativos que rexen o contrato que agora se saca a licitación.

María Eugenia Martín explicou que “a finalidade destes traballos foi elaborar uns pregos de máximos e de futuro nos que se reflicten os posibles cambios demográficos e de infraestruturas que pode experimentar Ames nos vindeiros 15 anos”. A concelleira detallou que nos pregos introdúcense importantes melloras como a elaboración dun plan de vertidos, outro de fugas ou de calidade da auga. Ademais, explicou que se modernizará o servizo mediante a introdución de avances tecnolóxicos como un sistema de información xeográfica ou a posta en marcha dunha páxina web na que consultar os consumos. María Eugenia Martín agradeceu o traballo de todos aqueles que colaboraron na elaboración destes pregos, entre os que destacou os técnicos, traballadores municipais ou a parte dos membros da oposición.

Na mesma liña manifestouse o alcalde de Ames, Santiago Amor, que subliñou que “o Concello fixo o que se debe de facer; redactar os pregos sen pedir asesoramento a ningunha empresa que puidese estar interesada no procedemento”. O rexedor fixo fincapé en que “se tratou dun proceso totalmente transparente” e destacou que “os principais beneficiados serán os veciños, xa que son uns pregos adaptados ao momento actual”.

O servizo de abastecemento e saneamento municipal vénse prestando pola empresa concesionaria Espina y Delfín mediante un contrato asinado en setembro de 1998 e que ten unha vixencia de 15 anos, rematando neste 2013. O Goberno amiense é consciente da vital importancia deste servizo, por afectar a todos e cada un dos veciños e veciñas do Concello de Ames e referirse a unha prestación de carácter obrigatorio, intimamente ligada á vida diaria dos cidadáns. Ademais, esta concesión representa o contrato máis importante desde o punto de vista económico dos que actualmente mantén o Concello.

Mocións
No pleno de setembro tamén se aprobaron dúas mocións presentadas polo grupo socialista e que contaron con emendas do grupo municipal popular. A primeira moción, sobre os incendios forestais, contou cunha emenda do grupo municipal popular e foi aprobada cos votos a favor dos concelleiros/as do grupo de goberno e de seis dos concelleiros/as non adscritos. Os edís do grupo socialista e os concelleiros/as non adscritos restantes abstivéronse.

Tamén se abordou unha moción sobre a situación dos pensionistas que teñen prestacións no estranxeiro, que tamén contou cunha emenda do grupo popular e que foi aprobada por unanimidade.

Contido relacionado

El Correo Gallego: "Ames licitará por 15 años y 33,5 millones traída y saneamiento"
La Voz de Galicia: "Ames recibirá cuatro millones de euros por el canon del agua"