Coa a posta en funcionamento da aplicación Councilbox pódese realizar hoxe, a partir das 20.30 horas, unha nova sesión plenaria extraordinaria, na que a Corporación municipal debaterá a aprobación provisional da derogación da ordenanza fiscal reguladora da taxa por ocupación de terreos de uso público con mesas, cadeiras, tribunas, taboados e outros elementos análogos, con finalidade lucrativa.

O obxectivo do goberno municipal e do resto de grupos políticos municipais é derogar dita ordenanza, para que os locais hostaleiros e comerciantes non paguen as taxas deste ano e poidan incrementar a superficie das súas terrazas, sempre tendo en conta os informes técnicos do departamento de urbanismo. Esta medida axudará a hostaleiros e comerciantes coa eliminación da taxa de terrazas deste exercicio. O Concello deixará de percibir este ano preto de 18.000 euros polas taxas de terrazas.

Esta é a terceira sesión plenaria que se realiza deste xeito, despois dos plenos ordinarios de marzo e abril, celebrados os días 16 e 30 de abril. Preme aquí para consultar a orde do día do pleno extraordinario do 14 de maio de 2020.

Procedemento do Pleno Telemático
A través desta aplicación, durante a realización da sesión, tan só se ve á persoa que está falando en cada momento coa quenda de palabra, e non a todos os/as participantes. O presidente do Pleno, neste caso o alcalde, é o encargado de darlle a palabra a cada participante. Dita aplicación permite establecer o quórum necesario para aprobar os asuntos tratados na sesión plenaria e elaborar unha orde dos día cos puntos a tratar.

A aplicación coa que se realiza o Pleno Telemático inclúe unha opción para votar de xeito telemático (a favor, en contra ou para absterse) e de forma certificada. Unha vez feita a votación a propia aplicación fai reconto de votos e confirma se o asunto foi aprobado ou rexeitado.

O pleno será gravado e a citada aplicación permite facer un borrador de acta que tamén se pode converter a formato texto. O pleno poderase seguir en directo vía streaming. Para iso tan só hai que premer no banner que está colocado na cabeceira da páxina de inicio da web municipal.