O encontro entre os membros do goberno amesá e a directiva da Asociación de Empresarios do Novo Milladoiro produciuse onte para trasladarlle as actuacións que vai realizar o concello no polígono.

A nova máis agardada é a da ampliación das prazas de aparcamento no polígono do Milladoiro. Segundo o alcalde de Ames, Blas García, o aparcamento vaise ampliar en 100 prazas na rúa Castiñeiras “imos pasar de 48 a 104 prazas no primeiro tramo da rúa Castiñeiras e de 40 a 60 no segundo ao aproveitar as zonas de vexetación”.

O presidente de Asociación de Empresarios do Novo Milladoiro, Javier Santos, amosou a súa satisfacción ante a nova “a ampliación dos aparcamentos é unha actuación moi necesaria porque o polígono do Novo Milladoiro está a vivir un momento de crecemento económico cun aumento das naves, do número de empregados e as empresas en alza”.

Estudo de mobilidade
Outra das actuacións que vai realizar o Concello de Ames no polígono do Novo Milladoiro é un estudo de mobilidade. O estudo, que vai comezar en setembro, ten por obxecto mellorar o tránsito de vehículos e camións, facilitar o acceso ás naves ou afondar na seguridade viaria do parque empresarial.

A concelleira de Tráfico e mobilidade, Beatriz Martínez, solicitou a colaboración das/os empresarias/os para coñecer a problemática das empresas do polígono, recoller as súas necesidades e as súas sensibilidades.

Os empresarios e as empresarias agradeceron poder participar nesta primeira fase de análise e diagnóstico e insistiron en que o estudo debe equilibrar a practicidade coa seguridade.

O goberno comprometeuse a manter outra reunión cos empresarios e empresarias unha vez finalizado o estudo para facer unha posta en común.

Humanización da N-550
O rexedor, tamén, aproveitou a ocasión para trasladarlle á Asociación de Empresarios do Novo Milladoiro a actuación que vai realizar o Ministerio de Fomento na rotonda de entrada ao Milladoiro.

O Ministerio de Fomento deseñou un acceso directo de entrada e saída do parque empresarial, sen pasar pola glorieta, de cara a conseguir maior axilidade no tráfico. Esta proposta de Fomento modifica o proxecto inicial presentado polo Concello de Ames co apoio dos empresarios.

Javier Santos, presidente da Asociación de Empresarios do Novo Milladoiro insiste en retomar a proposta inicial que propoñía unha rotonda de dobre altura “esta rotonda serviría tanto para aliviar o tráfico de entrada coma o de saída ao polígono e ao mesmo tempo o do interior do Milladoiro; é unha solución máis laboriosa pero tamén a longo prazo”.

O alcalde de Ames, Blas García, vaille trasladar a petición dos empresarios de volver á proposta inicial tanto ao Ministerio de Fomento como ao delegado do Goberno en Galicia, José Miñones.

Novas relacionadas:

La Voz de Galicia: "El polígono Novo Milladoiro tendrá cien plazas más para aparcar y un plan de movilidad"

Lindeiros: "Máis prazas de aparcamento para o polígono do Milladoiro"

Revista AMESGO: "Cen novas prazas de estacionamento no polígono do Milladoiro"

El Correo Gallego: "Fomento deseña un acceso directo para o Polígono do Novo Milladoiro"