Unha das coordinadoras do departamento de proxectos de 7H Cooperativa Cultural, Clara R. Cordeiro, declarou que “o festival é un pouco a sucesión do traballo feito en anos anteriores co proxecto educativo Elas tamén pintan no que fomos facendo ese traballo de análise e de investigación que agora ve o seu cume no proxecto do festival no que podemos permitirnos o luxo de convidar a moitas artistas de fora, aínda que tamén galegas, a convivir con nós durante unha semana na comarca de Compostela”.

Ademais Clara tamén explicou a importancia que ten para elas o feito de descentralizar  o festival: “para nós era tamén fundamental intentar descentralizar un pouco a actividade cultural do centro de Santiago, precisamente porque o Elas tamén pintan comezou como unha iniciativa en Santiago de Compostela á que acudiron en masa sobre todo mocidade de Teo e Ames, e por iso estamos moi contentas de que esta primeira edición poida contar coa colaboración destes dous concellos”.

Mentres que a outra coordinadora de proxectos de 7H Cooperativa Cultural, Eva Agra, recalcou que  “para nós o punto importante é que as artistas non só veñan a facer unha intervención mural senón que poidan interactuar con todas as persoas que se acheguen ou que vivan nestes concellos e que traballen incluso con colectivos que poidan ser afíns ás temáticas que imos a traballar: feminismo, diversidade, inclusión... parécenos importante que todo iso se plasme nos muros e se crea un ambiente de dialogo e de conversa no que poidamos compartir esas inquedanzas”.  

Xa para rematar a rolda, a concelleira de Benestar Social recalcou que “é unha experiencia novidosa onde podemos dar visibilidade  que as rúas tamén son nosas , que nos tamén temos moito que dicir na arte urbana, que as mulleres podemos e aí estamos” engadindo que  “convidamos á todas aquelas que se queiran sumar que participen e que lle demos un pulo á esta nova experiencia que esperemos que se poida repetir en anos vindeiros, que se extrapole a outras cidades galegas e incluso que poida ir máis alá das nosas fronteiras”.

Desta maneira, o “Delas Fest” conta cun  programa de actividades que combina intervencións artísticas, obradoiros de creación e faladoiros con profesionais do sector. Levarase a cabo grazas á colaboración da Deputación da Coruña, a Concellería de Benestar Social do Concello de Ames, a Concellería de Igualdade e Benestar do Concello de Teo e a Concellería de Cultura do Pazo de Raxoi. Ademais, conta co patrocinio de diversas empresas e entidades como son  Cuarto Pexigo, Pinturas PROA, Gadis, Fogar Natural, Infinita Viajes y Eventos, Dinamo Mensaxería e Publicidade en Bicicleta.

A programación do festival
Contarase coa participación de 7 artistas feministas, con diferentes disciplinas, sensibilidades e enfoques, que empregan o espazo público como soporte de expresión e ámbito de intervención política. Unha delas é a versátil e multifacética Btoy (Barcelona, 1977), unha artista contextual que utiliza dende carteis a colaxe e pintura plástica en obras nas que principalmente as protagonistas son mulleres. Estará tamén a fotógrafa e socia fundadora do Colectivo 4F Lorena Cosba (Huesca, 1979), interesada na fotografía experimental e na reutilización e intervención de obxecto encontrado a través das instalacións. A grafiteira e activista Vegan Bunnies (Perú-Catalunya), integrante do colectivo The Hate Lovers, que loita polo empoderamento da muller no sector; e o Dúo Amazonas, conformado polas artistas e activistas visuais Natalia Andreoli (Bos Aires, 1992) e Lina Castellanos (Bogotá, 1990) quen entenden o muralismo coma un exercicio de autoreflexión, diálogo e intercambio co territorio e as súas habitantes, integran o cartel de creadoras de recoñecido prestixio no panorama feminista da arte de rúa que deixarán a súa pegada en distintos espazos da comarca compostelá.
 
O programa de actividades do festival, comisariado pola historiadora da arte e especialista en xénero e creación contemporánea Clara Rodríguez Cordeiro (Ourense, 1983), está integrado por tres intervencións artísticas, que desenvolverán Btoy, Lorena Cosba e Dúo Amazonas, e dous obradoiros de creación. Un deles, de carácter especializado, destinarase a mulleres artistas doutros ámbitos creativos -coma a ilustración ou as artes plásticas- e será impartido por Vegan Bunnies, quen realizará unha aproximación á arte de guerrilla como ferramenta que democratiza a expresión e intervención no espazo público. O segundo taller, dirixido á mocidade da comarca interesada en iniciarse na arte urbana, desenvolverase baixo a dirección de 7H Cooperativa Cultural co obxectivo de facilitar referentes, ferramentas e técnicas creativas ás mulleres máis novas.

Como colofón, realizarase unha xornada de encontro interdisciplinar e interxeracional entre as artistas, as participantes dos obradoiros, as asociacións e colectivos implicados, mulleres profesionais, programadoras de festivais de arte urbana e entidades do sector así como toda persoa interesada na disciplina. Nela terán lugar dous faladoiros -un con Vegan Bunnies e outro con Lara Seixos- e unha mesa de experiencias, na que participarán Lupita Hard e Iria Fafián, ademais do resto de participantes no evento.

O festival conta cun comité de xénero
Co fin de garantir a rigorosidade da proposta artística do festival, dos procesos creativos xurdidos no mesmo e dispoñer da asesoría e apoio especializado, o festival conta cunha comisión de xénero integrada por Patricia Porto Paderne, educadora social e responsable da libraría feminista Lila de Lilith; Marián Mariño Costales, Técnica de Igualdade do Consello da Cultura Galega; Xoana Almar, muralista e socia da cooperativa Cestola na Cachola; e Eva Agra, ilustradora feminista, autora de Mulleres Bravas da nosa historia e socia de 7h Cooperativa Cultural. As catro colaboraron na conformación da proposta artística do festival a través da asesoría na selección de participantes, na elección de espazos a intervir e na implicación dos colectivos de cada municipio.