O Trouleando continúa en febreiro cunha tarde no campo de paintball do Eo dos Menecos, situado en Oza, Teo. Alí, a mocidade poderá gozar dunha actividade en equipo, que combina exercicio, estratexia, contacto coa natureza e moita adrenalina. Ao longo da xornada formaranse varios equipos, que deberán eliminar aos compañeiros e compañeiras dos demais conxuntos, empregando as marcadoras de aire comprimido que disparan bólas de pintura biodegradables.

Para a práctica segura da actividade, os mozos e mozas recibirán as instrucións do persoal especializado do campo de paintball, que mostrará como manexar o material, as regras de xogo e as medidas de seguridade a ter en conta. Haberá dous grupos de idade, xa que o paintball con marcadores de aire comprimido só está autorizado para a mocidade a partir dos 14 anos, polo que os rapaces e rapaces de 12 e 13 anos só poderán empregar marcadores infantís.

Dende a OMIX recordan que as persoas que se inscriban nesta proposta deberán ir provistos dunha toalla, roupa cómoda e zapatillas que se poidan manchar. A organización tamén recomenda levar calzado e roupa de reposto, co fin de cambiar as prendas que queden manchadas pola pintura.

Na saída ao campo de paintball poderá participar a mocidade empadroada no concello de Ames a partir dos 12 anos (persoas nadas no 2009). Ademais, haberá autobuses dende os dous núcleos urbanos principais do concello para desprazarse ata Teo. O transporte sairá do Pazo da Peregrina de Bertamiráns ás 15:00 horas e volverá ás 19:45 horas. Pola súa banda, os horarios de ida e volta dende a Casa da Cultura do Milladoiro serán as 15:15 e as 19:30 horas.

Será preciso contar cun mínimo de 15 mozas e mozos para desenvolver a proposta. En caso contrario, o Concello de Ames poderá anular a actividade.

Para calquera dúbida, pódese contactar coa Oficina Municipal de Información Xuvenil, a OMIX, no correo electrónico omix@concellodeames.gal.

Novas relacionadas

El Correo Gallego: "A mocidade de Trouleando poderá probar co paintball"