Un ano máis o tradicional concerto de Nadal do Concello de Ames xuntou a un gran número de veciños e veciñas que se achegaron ao auditorio da Casa da Cultura de Bertamiráns, para gozar coa música dos grupos de baile e música tradicional do noso concello. Nesta ocasión contouse coa participación de Os Castros, as Pandereteiras da Costaneira, Os Retranqueiros, Airiños do Paseo de Colón, As Maianas e a Requinta da Maía.

A asociación cultural Os Castros, coa súa banda de gaitas, foron os encargados de dar comezo ao recital, interpretando “Xota de Lucas” e “O Galo”. De seguido, actuou o grupo de baile para representar “Muiñeira da Costa”.

De seguido, as Pandereteiras da Costaneira, interpretaron os temas “Valse de Elena”, “Danza, xota e muiñeira de Barcia de Mera” e “Nadal de Luíntra”. O grupo, fundado no 2017 e integrado na actualidade por nove mulleres, participa en diferentes actos culturais, como seráns ou festivais, adoitan interpretar temas tradicionais do folclore galego e portugués, ademais de recompilar e incluír no seu repertorio coplas das persoas maiores da contorna amesá.

A asociación cultural Os Retranqueiros, representaron os “Cantares de Elena, Clara e Aurora”, recollidas en Toutón-Mondariz, e “Muiñeira e Xota de Bembibre”, recompiladas na zona de Bembibre en Val do Dubra. A agrupación, fundada no 2015, vai cumprir en febreiro unha década percorrendo diferentes escenarios dentro e fóra de Galicia, chegando a ofrecer espectáculos en Madrid ou en localizacións de África. A pesar da xuventude da formación, contan con máis de 100 socios.

A música continuou da man da agrupación Airiños do Paseo de Colón, que interpretaron os temas “Valse da Pobra de Burón”, “Polca para Gabi” e “Muiñeira dos Dezas”. Na actualidade, o grupo está formado por 6 compoñentes, cun amplo repertorio formado por pezas de distintos grupos de música tradicional, que poden utilizar para a súa interpretación empregando gaitas, clarinete, saxofón, acordeón e percusión (bombo, tambor e pandeireta).

As Maianas interpretaron “María”, “Cuba”, “Que te leve o demo” e “Rexoubeiras”. Esta agrupación de 5 mulleres, levan xa uns cantos anos facendo gozar ao público coas súas cancións, a maioría de composición propia.

Os encargados en poñer punto e final ao concerto de Nadal foi o grupo Requinta da Maía, da asociación cultural Follas Novas. Representaron o tema “O Torre”, mentres que o grupo de pandeireta interpretou “Valse de Pazos de Borbén”, o grupo de baile representou “O Esparaván do Incio” e, finalmente, representaron unha panxoliña do Algarve chamada “Linda Noite”. A agrupación, integrada por 9 compoñentes, inclúe diferentes instrumentos do folclore galego; as gaitas, as requintas, os clarinetes, acordeón, caixa e bombo.