O vindeiro xoves 13 de febreiro, ás 18.00 horas, o departamento de Cultura do Concello de Ames, organiza un obradoiro de malabares, no que os participantes poderán gozar dunha tarde diferente en familia na que os pais e crianzas traballarán de forma conxunta aptitudes e habilidades como a psicomotricidade, o equilibrio ou o traballo en equipo.

Os malabares é unha actividade moi beneficiosa para os máis pequenos, pois axudan a mellorar capacidades como a concentración, a constancia ou a disciplina. Ademais, son unha gran maneira de coñecer ao noso propio corpo, así como aprender a tomar unha maior conciencia sobre os  seus movementos.

Residencias artísticas
Este obradoiro é unha actividade de mediación que levará a cabo a compañía Xampatito Pato tras realizar unha residencia artística no auditorio do Milladoiro entre setembro e outubro do pasado ano 2024, na que ensaiaron a súa obra “Compaña”, que se representará o vindeiro 21 de febreiro no auditorio de Bertamiráns.

As residencias artísticas do Concello de Ames son unha iniciativa que ten como obxectivo apoiar a creación artística do tecido profesional e empresarial, facilitándolles aos grupos de artes escénicas espazos e equipamento para o ensaio e produción do seus proxectos. Deste xeito, a cambio de ceder estes espazos, as compañías deben propoñer actividades pedagóxicas orientadas á comunidade educativa, de promoción do teatro, orientadas á creación de novo público e á estrea das novas producións.

Inscricións
As persoas interesadas en participar nesta actividade poderán inscribirse enviando un correo ao enderezo electrónico cultura@concellodeames.gal. Hai 16 prazas dispoñibles, sen contar ás persoas adultas, e adxudicaranse por rigorosa orde de inscrición.