A Policía Local de Ames está a realizar controis preventivos de alcol e drogas. Estes operativos intensifícanse nas fins de semanas e nas zonas de locais de ocio nocturno dos núcleos de Bertamiráns e do Milladoiro. Entre as probas realizadas, dúas persoas deron positivo. A quenda da noite do venres saldouse cunha persoa denunciada administrativamente por conducir cunha taxa de alcol de 0,38 mg/l na primeira proba e 0,35 mg/l na segunda.

Na xornada do sábado realizáronse novos controis de alcol e drogas, co resultado dunha persoa denunciada administrativamente por conducir cunha taxa de alcol do 0,46 mg/l na primeira proba e 0,46 mg/l na segunda.

O balance da fin de semana saldouse, ademais, cunha persoa detida na mañá do sábado por desobediencia, resistencia e atentado aos axentes da autoridade.

Ao longo da semana a Policía Local de Ames vai realizar controis de velocidade no concello. Vixiaranse especialmente as rúas dos núcleos urbanos de Bertamiráns e do Milladoiro co obxectivo de reducir a accidentalidade e as consecuencias derivadas dos sinistros.

Os axentes municipais contan con dous radares, un radar móbil propio da Policía de Ames e un vehículo, cedido pola DXT, equipado cun radar e cun etilómetro.

A velocidade excesiva ou inadecuada segue a ser unha das principais causas dos accidentes de tráfico. Non se pode esquecer que no 29% dos casos de accidentes mortais a velocidade foi un factor determinante. Unha velocidade axeitada evitaría unha cuarta parte das vítimas mortais en accidentes de tráfico.

O concelleiro de Seguridade Cidadá, Víctor Fernández, destacou o traballo realizado pola Policía Local de Ames e motivou a realización de controis de velocidade “con este tipo de controis o que se pretende é concienciar á cidadanía da importancia de circular á velocidade indicada, especialmente en espazos urbanos nos que distintos tipos de vehículos comparten espazo cos peóns”.

Balance Campaña de Vigilancia e Control distraccións ao volante
A Policía Local de Ames presentou o balance da Campaña da DXT “Vixilancia e control de distraccións ao volante” que se realizou entre o 16 e o 23 de setembro. Esta campaña ten por obxecto concienciar aos condutores sobre a importancia de evitar as distraccións ao volante. 

Os axentes da Policía Local controlaron un total de 755 vehículos ao longo dos sete días que durou a campaña. Nesta edición da campaña denunciáronseun total de 5 vehículos. Dese total, 4 correspóndense coa utilización do teléfono móbil ao volante e unha por utilizar cascos ou auriculares mentres se conduce.

Novas relacionadas

La Voz de Galicia: "La Policía Local de Ames realiza controles de velocidad esta semana"

Revista AmesGo: "Cinco multas en Ames por uso do móbil ou auriculares ao volante"