Continúan as actividades das bibliotecas de Ames polo mes das letras coa terceira presentación do mes, despois de que Daniel Pino e Henrique Monteagudo conduciran dous actos sobre as súas respectivas obras a comezos de mes, “As casualidades necesarias” e “O idioma galego baixo o franquismo”.

“O sal dos días” foi o poemario seleccionado polo Concello de Padrón como gañador da sétima edición do Certame poético Rosalía de Castro, no pasado mes de maio de 2021. O traballo, recoñecido polo xurado pola súa estrutura e coherencia temática, foi o primeiro dos dous poemarios polos que Vilar recibiu un galardón o pasado ano. En decembro, a súa obra “Furtivas” levou tamén o X Certame de poesía Xosé Manuel López Ardeiro, organizado polo Concello de Negreira.

Rafa Vilar (Cee, 1968) é un escritor galego cunha extensa obra no eido da poesía, con máis dunha ducia de títulos publicados dende os anos 90. Algúns dos galardóns cos que foi recoñecido foron o Premio Fermín Bouza Rey 1992 por “Liques da memoria”, o Eusebio Lorenzo Baleirón 2006, por “Escoración dos días”, o Cidade de Ourense 2008, por “Migracións”, ou o Premio Arume de poesía para nenas e nenos 2011 por “Patente de corso (pequeno dicionario pirata)”. No ano 2021, levou o Premio Rosalía de Castro de Poesía, por “O sal dos días” e gañou o X Certame de Poesía Xosé Manuel López Ardeiro, con “Furtivas”.

No encontro literario acompañará ao autor o profesor e escritor Manuel Lorenzo Baleirón, nun acto que estará presentado pola concelleira de Cultura, Natividade González.