[26-02-2014] Os operarios veñen de finalizar as tarefas de acondicionamento das zonas axardinadas do polígono Novo Milladoiro co obxectivo de eliminar a maleza existente e de acondicionar os espazos verdes do parque. En total, o Concello de Ames actuou nunha superficie de 15.000 metros cadrados.
Os traballos incluíron o desbroce de elementos vexetais situados nestas áreas axardinadas entre os que destacou a poda de setos, palmeiras, plantas e arbustos. Ademais, acometeuse a tala do arborado que se atopa situado baixo liñas de alta tensión. As tarefas de acondicionamento de zonas verdes tamén levaron aparellada a limpeza de pavimentos e recorte de hedras. Neste conxunto de tarefas tamén se incluíu o acondicionamento das rotondas situadas na rúa Castiñeiras.
Os operarios traballaron nas tres principais áreas verdes existentes no polígono, acometendo o seu desbroce e a poda xeral de plantas e arbustos. Tamén se realizou o recorte de hedras, despexando os camiños e procedendo á limpeza de noiros. Ademais, levouse a cabo a poda do seto falso de loureiro existente na zona a unha altura de 1,80 metros aproximadamente.
Todos estes restos vexetais foron recollidos e tratados mediante diferentes sistemas. Deste xeito, levouse a cabo o triturado mediante máquina dos elementos vexetais de pouco diámetro, mentres que os troncos foron recollidos en colectores para a súa posterior reciclaxe. Ademais, recolléronse os residuos sólidos urbanos que existían nestas zonas.
Por último, os operarios acometeron o acondicionamento das rotondas mediante diferentes labores como son a poda de palmeiras, a retirada de elementos vexetais e o seu desprazamento a un xestor autorizado para o seu posterior tratamento.