O Concello de Ames está a colaborar un ano máis coa asociación de Solidariedade Galega co Pobo Saharauí (SOGAPS) na campaña Vacacións en Paz 2023, un programa de acollida no que centos de nenos e nenas que viven en campos de refuxiados en Tindouf (Arxelia) pasan o verán en Galicia.

A iniciativa permite que os cativos e cativas escapen das altas temperaturas que se acadan durante o período estival no deserto saharauí, así como que pasen revisións médicas, aprendan galego e castelán e se evadan da súa realidade durante unhas semanas.

Dende o Concello, a través da Concellaría de Benestar Social, animan ás familias amesás que estean interesadas a participar no proxecto, por tratarse dunha iniciativa solidaria de gran valor cultural tanto para as crianzas como para as persoas que os acollen.

Este venres 4 de novembro ás 20:00 celebrarase unha reunión informativa no Hotel Congreso, situado na rúa das Mámoas de Montouto, Cacheiras. Todos aqueles que queiran asistir deberán enviar un correo electrónico ao enderezo asociacionsogaps@yahoo.es ou chamar ao correo 986 26 26 37 e indicar que queren asistir á cita, ademais de proporcionar os seus datos.

Para máis información sobre o programa ou o proceso de inscrición, ou para resolver dúbidas, pódese escribir a sogaps.oficial@gmail.com ou chamar ao 678 727 382.

Novas relacionadas:

El Correo Gallego: "Animan aos amesáns a ser solidarios co pobo saharauí"

Enfoques: "Ames busca familias para acoger niños saharauis en el programa 'Vacacións en paz'"