Este venres, 19 de outubro, estaba previsto que o grupo Aquelando Teatro de Muros representase na Casa da Cultura de Bertamiráns o obra Allan, que se encadra dentro da programación da Mostra de Teatro Afeccionado que se está desenvolvendo ao longo do mes de outubro nas casas da cultura de Bertamiráns e do Milladoiro. Por motivos de saúde dun dos integrantes deste grupo de teatro non se poderá levar a cabo esta función. Dende o Concello de Ames deséxaselle unha pronta recuperación a esta persoa.

A mostra continuará o venres 26 de outubro na Casa da Cultura do Milladoiro coa representación da obra Café a cargo do grupo O aturuxo de Melpómene, de Narón. Esta peza teatral está destinada a persoas maiores de 12 anos e conta cunha duración de 80 minutos.

Esta comedia transcorre nun espazo temporal no que o café se considera unha droga perigosa. Esta substancia ben podería substituírse por calquera outra que resulte aditiva, xa que do que se trata, en definitiva, é demostrar o lado escuro das adiccións. A representación é unha metáfora en si mesma sobre os efectos das drogas nas persoas e o difícil que resulta saír dese universo paralelo no que se somerxen os individuos cando dependen delas.

A través deste festival, a Concellaría de Cultura pretende promocionar, dar a coñecer e darlles aos grupos de teatro afeccionado un escenario onde poidan expresarse e representar as súas pezas teatrais. Ao mesmo tempo achégalles aos amienses espectáculos que están fóra dos circuítos comerciais pero que teñen un grande interese.

Contido relacionado

El Correo Gallego: "Suspéndense a terceira xornada da Mostra de Teatro Afeccionado"