Xa está todo preparado para unha das actividades culturais que máis expectación xeran entre a veciñanza amesá. Trátase do XIX Festival internacional de Maxia de Ames “FestiMax”, que se desenvolverá os días 25, 26 e 27 de outubro nas Casas da Cultura de Bertamiráns e do Milladoiro. Premendo nesta ligazón pódese consultar o programa do festival ao completo.

Na actualidade aínda quedan algunhas entradas para as catro sesións da Gala Máxica Internacional que se poden adquirir a través da Billeteira electrónica. Tamén quedan algunhas prazas libres para a sesión das 11.00 horas dos obradoiros de maxia que se imparten en Bertamiráns e no Milladoiro. Os convites para o espectáculo de maxia para bebés “Patapún” están esgotados.

Maxia para todos os públicos
A programación do FestiMax está composto por catro grandes espectáculos que se van a realizar os días 25, 26 e 27 de outubro. As actividades comezan o venres 25 de outubro cunha das principais novidades desta edición. O mago galego Dani Polo, gañador de múltiples premios e presente nos principais festivais máxicos de Europa, levará a ilusión aos maiores do concello en dúas sesións: a primeira será no local dos maiores de Bertamiráns, ás 11:00 horas; mentres que a segunda será no local da asociación JUPEMI no Milladoiro, ás 17:30 horas.

Outra das novidades deste ano é o espectáculo de maxia para bebés, no que o Mago Paco presentará a súa proposta “Patapún”. Así, este especialista en maxia infantil propón un espectáculo divertido e visual para os máis cativos. Haberá dúas sesións na Casa da Cultura do Milladoiro o venres 25, unha ás 17:00 horas e outra ás 18:15 horas. Esta actividade está dirixida a crianzas entre 1 e 4 anos, e poderán acudir un máximo de dous adultos por neno/a. Os convites para ver este espectáculo están esgotados.

O Baúl da maxia
Tamén o venres, 25 de outubro, a partir das 18:00 horas, na praza de Chavián haberá varios pases de “maxia de proximidade” para grupos reducidos a cargo da maga arxentina Lore Lavand na súa caravana máxica. Os pases serán cada media hora, entre as 18:00 e as 20:30 horas. Só haberá 20 persoas por pase, e o acceso será por orde de chegada.

Obradoiros de maxia
Outra das actividades que se realizan este ano serán os obradoiros de maxia, dirixidos a rapaces e rapazas de entre 8 e 14 anos. Así, o sábado 26 de outubro, o mago Paco impartirá un taller de maxia na Casa da Cultura do Milladoiro. Formaranse dous grupos de 12 participantes cada un. A primeira sesión farase ás 11:00 horas e a segunda a continuación, ás 12:00 horas.

O domingo 27 este mesmo obradoiro impartirase na Casa da Cultura de Bertamiráns. Tamén será impartido polo mago Paco en dúas sesións, ás 11:00 e ás 12:00 horas, e formaranse dous grupos con 12 nenos/as en cada un.

Para participar é necesario inscribirse enviando un correo electrónico ao enderezo cultura@concellodeames.gal. En dito correo hai que poñer o nome, apelidos e idade da persoa que quere participar no obradoiro de maxia, e un número de teléfono de contacto. Aínda quedan algunhas prazas libres para a sesión das 11.00 horas dos obradoiros de maxia que se imparten en Bertamiráns e no Milladoiro. As prazas das sesións das 12.00 horas están esgotadas.

Photocall máxico
Outra das novidades desta edición é un photocall máxico, que xa está instalado esta semana na Casa da Cultura de Bertamiráns e a próxima semana estará na Casa da Cultura do Milladoiro. As persoas que acudan a ver algún espectáculo ou participar nos obradoiros de maxia poderán facer unha foto. Trátase dun sofá no que as persoas que o desexen poderán facer unha foto seguindo as instrucións que estarán colocadas xunto a dito sofá.

Gala máxica internacional
A Gala máxica internacional farase tamén o sábado 26 e mailo domingo 27 de outubro. Como nos últimos anos haberá catro pases debido á gran demanda que ten este espectáculo entre a veciñanza amesá. A Gala estará presentada polo mago Migue e participarán os magos Nacho Samena (Galicia), Ramó & Alegría (Cataluña), Bruno Tarnecci (Perú) e Néstor Hato (Francia).

Así, o sábado 26 realizarase o espectáculo Experiencia Máxica na Casa da Cultura do Milladoiro, mentres que o domingo 27 de outubro desenvolverase o espectáculo na Casa da Cultura de Bertamiráns. Ambos días a primeira función será ás 17:00h e a segunda ás 19:30 horas. Na actualidade aínda quedan algunhas entradas para as catro sesións da Gala Máxica Internacional que se poden adquirir a través da Billeteira electrónica.

Para máis información pódese chamar aos números de teléfono 981 535 940 / 662 377 444 ou escribir un correo electrónico ao enderezo cultura@concellodeames.gal.