Este luns, 25 de novembro, conmemorouse o Día Internacional de Eliminación da Violencia Contra as Mulleres. Para a súa conmemoración, o Concello de Ames e a Plataforma feminista galega de Ames realizaron diversos actos na praza do Concello, en Bertamiráns. En primeiro lugar fíxose o reparto do material da campaña En negro contra as violencias no interior da Casa do Concello. Deste xeito, os veciños e veciñas que participaron neste acto puideron poñer unha camisola con diferentes lemas contra a violencia de xénero ou coller pins, marca páxinas de madeira, bolsas de tea e cadernos.

De seguido, na praza do Concello, leuse un manifesto, apoiado por todos os grupos políticos municipais, e de seguido, seis mulleres do goberno municipal e da Plataforma feminista fixeron unha performance para visibilizar o problema da violencia machista. As protagonistas foron MULLERES (Pilar, Ana, Chiruca, Eva, Bea e Marta) diversas e diferentes, pero que comparten a mesma visión do feminismo e da igualdade. Desta vez,  representaron un obradoiro de teatro e corporalidade para desenvolver unha acción escénica que denuncia as múltiples violencias que cada día sofren por ser mulleres.

Un bo número de veciños e veciñas de todas as idades achegáronse ata a praza do Concello para participar nestes actos e tinguir a praza de negro en mostra de repulsa da veciñanza amesá á violencia de xénero. Posteriormente, representantes do goberno municipal e da Plataforma feminista de Ames participaron na concentración celebrada na praza 8 de Marzo, en Santiago de Compostela.

Estas actividades súmanse ás IX Xornadas Acércate de Igualdade e Prevención da Violencia de Xénero, que se desenvolveron o pasado xoves, 21 de novembro, na Casa da Cultura do Milladoiro. Estas xornadas estiveron centradas na coeducación e o feminismo como movemento para abordar os desequilibrios de poder, con máis de 15 intervencións que se desenvolveron ao longo de toda a xornada.

En negro contras as violencias
O Concello de Ames uniuse, un ano máis, á campaña En negro contras as violencias, na que este ano participaron 138 municipios de Galicia e mailas Deputacións de A Coruña, Lugo e Pontevedra. A través desta iniciativa, procúrase fomentar a sensibilización cidadá contra as violencias machistas no eido municipal, a través da coordinación entre concellos de diferentes cores políticas. Con ela tamén se pretende implicar ao tecido económico, asociativo, educativo, deportivo, social e cultural, así como a toda a cidadanía, nunha resposta colectiva de rexeitamento á violencia de xénero e dos asasinatos machistas, incidindo, de maneira especial, nos comportamentos e expresións verbais que están detrás da violencia contra as mulleres.

Ao eido desta iniciativa, Ames puxo a andar a cuarta edición da campaña Ames en Negro entre os días 18 e 25 de novembro, na que este ano participaron máis de 150 axentes sociais, entre establecementos hostaleiros, comercios, empresas, asociacións, clubs deportivos, e toda a comunidade educativa do concello. A transversalidade da campaña, que aglutinou a moi diversos actores dos sectores económico e social e a parte importante da cidadanía de Ames, contribuíu ao aumento da súa visibilidade con respecto a anos anteriores.

Asemade, nos centros de ensino de Ames tamén se realizaron actividades, como os Obradoiros de Bo Trato para o alumnado de primeiro da ESO dos centros IES do Milladoio e IES de Bertamiráns. Finalmente compre engadir que existe unha campaña que está vixente todo o ano: Súmate a Igualdade. Coa que se trata de concienciar a toda a poboación da lacra social que constitúe a violencia de xénero e de que está na nosa man acabar con ela, co compromiso de toda a poboación.

Novas relacionadas:

El Correo Gallego: "Pola erradicación da violencia sexista"