Durante as últimas semanas estiveron executándose obras de adaptación na Biblioteca municipal do Milladoiro, para que a sala de estudo dispuxera de acceso as 24 horas e poida ser utilizada fóra do horario laboral do persoal municipal encargado da biblioteca. Tanto na sala de estudo do Milladoiro como na de Bertamiráns instalouse un novo sistema de lectura de códigos QR, que permite entrar e saír destas salas de estudo cando os/as usuarios/as necesiten empregar estas instalacións.

O alcalde de Ames e responsable do departamento municipal de bibliotecas, Blas García, explica que “as salas de estudo de Bertamiráns e do Milladoiro son instalación moi empregadas pola veciñanza de Ames. Dende hai tempo viñan reclamando poder ter un acceso mediante algún tipo de mecanismo que non dependese da dispoñibilidade do persoal municipal. Deste xeito, habilitamos no Milladoiro a primeira sala de estudo aberta permanentemente do concello, unha sala 24/365. En Bertamiráns a sala de estudo está dentro da Casa da Cultura, polo que o horario é limitado, pero o acceso tamén se fará a través de código QR”.

Solicitude do código QR de acceso
A solicitude do código QR para poder acceder ás salas de estudo de Bertamiráns e do Milladoiro pode facerse de xeito telemático cubrindo este formulario e enviando por correo electrónico ao enderezo biblioteca@concellodeames.gal. Unha vez sexa recibido por parte do persoal do departamento de bibliotecas enviaranlle ao móbil do usuario/a o correspondente código QR co cal poderán acceder ás salas de estudo. Dito trámite tamén se pode facer de xeito presencial nas bibliotecas cubrindo o correspondente formulario.

No momento no que se  cubre o formulario pódese optar por dispor do código QR para a sala de estudo do Milladoiro; de Bertamiráns; ou para as dúas salas de estudo. No momento de marcar estas opcións deberase ter en conta os horarios das dúas salas de estudo e que a sala de estudo do Milladoiro está aberta as 24 horas dos 365 días do ano.

A idade mínima para poder empregar as salas de estudo é de 14 anos. No caso de persoas menores de 18 anos, deberán constar no formulario os datos da persoa representante do/a menor. Por último, en dito formulario ofrécese a opción de recibir información do Concello de Ames sobre ás bibliotecas municipais.

Horario das salas de estudo
A sala de estudo do Milladoiro está aberta durante as 24 horas dos 365 días do ano. Pódese acceder desde a entrada que está situada na rúa de Abaixo. Os/as usuarios/as terán que acceder a través dun código QR. Durante o horario nocturno a porta que comunica co espazo de biblioteca estará pechada. Pola contra, durante o horario xeral diúrno a porta de comunicación entre ambos locais seguirá estando aberta. No teito da zona de entrada, pola rúa de Abaixo, instalouse unha cámara de vídeo-vixilancia conectada á instalación actual.

Por outra banda, a apertura da sala de estudo de Bertamiráns está supeditada ao horario de apertura da Casa da Cultura. Deste xeito, o horario de inverno (do 16 de setembro ao 14 de xuño) é de luns a venres, en días laborais, de 8:00 a 22:00 horas. Os sábados o horario é de 9:00 a 14:00 horas, mentres que os domingos está pechada. Durante o período estival (do 15 de xuño ao 15 de setembro, ambos incluídos) o horario varía, sendo de luns a venres, en días laborais, de 8:00 a 14:00 horas. Os sábados e domingos está pechada.