O Concello de Ames participa un ano máis no proxecto Youtubeir@s cos obxectivos de fomentar a creación de vídeos con temáticas e formatos diversos e de darlle visibilidade á produción en galego na rede e á comunidade youtubeira. Repartiranse un total de 7.500 euros en premios, cun incremento de 1.000 euros con respecto á pasada edición. O prazo para participar neste certame está aberto ata o 23 de outubro. Esta edición do proxecto Youtubei@s está tendo un grande éxito con numerosos vídeos que xa se presentaron ao concurso.

Ao abeiro do programa Apego, a concellaría de Normalización Lingüística pon en marcha “Brincadeiras Miúdas”, catro xornadas de xogos, bailes, cantos e contadas ao aire libre que se desenvolverán o 25 e 26 de agosto no pazo da Peregrina, en Bertamiráns, e o 1 e 2 de setembro no parque dos Piñeiros de Milladoiro. Animarán as sesións os Xogos do Paporrubio e Cé Orquestra Pantasma. A actividade está dirixida a familias con nenos e nenas de 2 anos en diante. O prazo de inscrición comeza hoxe e alóngase até o 24 de agosto. O aforo é limitado para garantir as normas de seguridade.

A XI edición dos premios Rosalía de Castro acaba de premiar o "Club de Debate" polos anos que leva favorecendo o emprego do noso idioma entre a mocidade. Ames participa neste proxecto colaborativo desde o seu inicio no curso 2011-2012. O departamento de Normalización Lingüística do Concello, en colaboración cos departamentos de Lingua Galega dos Centros de Ensino Secundario, fixeron posible a intervención de máis de 50 equipos e 500 alumnos e alumnas de Ames no tempo que leva desenvolvéndose esta iniciativa. Ademais de promover o uso do galego, o Club de debate fomenta a diversidade de opinións e a tolerancia e promove o pensamento crítico e analítico entre a mocidade. O premio está dotado con 3.000 euros.

Xosé Antón López Silva dá clases de latín en secundaria e é tradutor, crítico e editor. Paulo Calvo é profesor de Economía e Matemáticas e escritor. Nazaret López traballa como xornalista no departamento de Comunicación do Concello de Ames e é dramaturga e escritora. Os tres viven en Ames e serán os encargados de xulgar os 65 traballos que se presentan á XVII edición do Certame Literario de Ames. Unha edición estraña por mor da COVID-19 que obrigou a pospoñer prazos de entrega e resolución. O 19 de xuño pechouse a recepción de orixinais e o 30 de setembro farase pública a resolución do xurado. A entrega de premios realizarase, se as circunstancias o permiten, o mes de outubro.