Un ano máis, o Concello de Ames apostou pola promoción do deporte, unha actividade lúdica e mental que mellora substancialmente a vida de quen o practica. Por este motivo, a Concellaría de Deportes organizou no Milladoiro unha nova edición do Día do Deporte, no que a veciñanza amesá puido participar en diferentes deportes ao longo de toda a xornada. Así, as e os asistentes participaron de diferentes actividades de grupo, impartidas por clubs de Ames, como son o baloncesto, fútbol sala, voleibol, tenis, patinaxe, atletismo, xadrez ou piragüismo, xunto con outras actividades dirixidas a adolescentes e maiores como son o zumba, step, ioga, spinning, body combat ou pilates. Ademais, o Concello ofreceu a posibilidade de probar novas disciplinas nesta edición, como o squash e o golf.

Este domingo 24 de abril celebrouse a primeira edición da carreira de orientación do Concello de Ames, un evento organizado pola Concellaría de Deportes e Xesta Natureza. Persoas das catro provincias galegas achegáronse ata Bertamiráns para gozar dunha xornada na que se puxeron a proba a técnica e a capacidade de orientación das participantes. Conseguiron os mellores tempos o grupo Os de Cee 2, na categoría “Xestiñas”; no nivel intermedio, “Xestas”, impúxose o grupo AD Montebrondo, mentres que na categoría de maior dificultade, “Xesteiras”, rexistrou o mellor tempo Miguel. Preme aquí para consultar os resultados ao completo da I Carreira de Orientación do Concello de Ames.

14 integrantes do club amesá participaron no torneo galego nas categorías de sub 14, sub 8 e por equipos, tanto na categoría cadete coma na absoluta. Os deportistas da  Escola Ames Xadrez tamén xogaron nas competicións a menor tempo, como son o Lóstrego e Rápido, e nos torneos sub 10, acadando a quinta posición, e sub 12, no noveno posto.

Esta mañá o alcalde de Ames, Blas García, a concelleira de Deportes, Susana Señorís, e mailo concelleiro de Obras e Servizos Básicos, Gustavo Nieto, visitaron o novo campo de atletismo que se habilitou en Ventín. Estiveron acompañados polos técnicos do departamento municipal de Deportes e por representantes dos clubs de atletismo do concello; David García, do club Ames Atletismo e Joao Fernández, do club de atletismo MillaRaio. Dito proxecto, que estaba incluída no Plan Ames Progresa 2021 – 2023, foi adxudicado á empresa Jardinería Arce SL por un importe de 247.498,87 euros (IVE incluído). Deste xeito, o antigo campo de fútbol de Biduído foi adaptado como campo de lanzamento para a práctica do atletismo. Tratábase dun antiga demanda dos clubs de atletismo do concello. Entre ambos clubs dispoñen de máis de 200 nenos e nenas que practican diversas disciplinas de atletismo.