Durante este verán preto de 3.000 persoas tramitaron o carné de usuario/a para facer uso das piscinas descubertas de Bertamiráns e do Milladoiro. Tramitáronse arredor de 1.150 solicitudes, isto pódese traducir en máis ou menos 900 abonos familiares (2.700 persoas) e 250 abonos individuais (250 persoas). Ademais, das piscinas descubertas municipais, a área recreativa de Tapia, que se atopa ás beiras do río Tambre, convértese tamén nun lugar moi concorrido por todos os veciños e veciñas de Ames nesta época do ano.

O pavillón polideportivo municipal do Milladoiro acolleu o pasado sábado 26 de febreiro a sétima edición do seminario de defensa persoal que a Deputación da Coruña programou ao longo da provincia. Preto de 40 amesás aprenderon  ao longo de catro horas técnicas e estratexias para defenderse ante posibles agresións. As mulleres participantes recibiron un diploma acreditativo da súa participación.

O campo municipal de Bertamiráns acolleu a oitava edición do campus de fútbol 8 do Bertamiráns FC entre o 24 eo 28 de xuño. Na actividade participaron arredor de 90 nenos e nenas correspondentes ás categorías prebenxamin, benxamín e alevín, que non só realizaron traballo futbolístico específico e diversas competicións, senon tamén actividades acuáticas, xogos e visionamento de vídeos. Ao acto de clausura, que tivo lugar o venres, asistiron o presidente do Bertamiráns FC, Rafael Budiño, a concelleira de Deportes, Susana Señorís, e o segundo tenente de alcalde e concelleiro de Obras e Servizos Básicos, Blas García.

O deportista Raúl Rodríguez Paulino, da escola de kárate amesá Dokkodo, acaba de ser convocado pola Federación Galega de Kárate para participar no Campionato de España, que se celebrará os días 22 e 23 de abril na cidade de Cáceres. Rodríguez Paulino recibiu a noticia tras gañar sendas medallas de ouro no Campionato Galego, que tivo lugar o 25 de febreiro, e na 2ª Xornada da Liga Galega, disputada o 11 de marzo, na categoría kumite xuvenil -48 kg.