Os concertos comezaron ás 21.00 horas, co obxectivo de que as familias con nenas e nenos pequenos tamén puidesen achegarse ao concerto. Os primeiros en saír ao escenario foron os integrantes de Cuarta Xusta, o grupo orixinario de Melide integrado por Marta, Lúa, Alberto, Alba e Aida. Durante a súa actuación interpretaron varios dos temas do seu primeiro traballo discográfico, Un novo espertar, presentado o 10 de marzo do 2018, no que se recolle oito temas propios nos que cristaliza o seu obxectivo musical, “berrar con música as inxustizas que nos rodean”.

De seguido, foi a quenda de Zënzar, un dos grupos máis consolidados do panorama galego. A banda botou a andar no ano 1988 e conseguiu gravar a súa primeira maqueta en 1992. Dende entón percorreron todos os recunchos do país coa súa música. Na actualidade, o grupo está formado por Manolo García, Xosé A. Bocixa, Mario Grela, Paco Cerdeira e Laura Romero.

Posteriormente, saíron ao escenario os membros do grupo Nao, que se encontran inmersos na súa xira de despedida e que escolleron o Millarock como un dos seus últimos concertos. A banda, formada por Pablo Carracedo, Gustavo Brea, Antón Fernández e X. Ramón Iglesias; conta cunha traxectoria de trece anos marcada polo compromiso social e a súa forza no escenario. Durante o concerto, Nao interpretou algúns dos seus temas máis coñecidos, ao tempo que fixo un percorrido polo seu último disco, titulado Ata que o lume se apague.

Dios ke te crew pechou o festival
Esta edición do Millarock pechouse coa actuación do grupo de rap, Dios ke te crew, que volveron á escena musical despois dun tempo retirados. Formado por Mou, Sokram, Jamas e Dj Murdock, esta banda de Ordes destaca polos seus directos e as súas letras cargadas de ironía, orixinalidade e unha música moi propia que mistura toques de rock, jazz ou funk. No Millarock volveron a facer unha gran actuación, demostrando que son unha das mellores bandas galegas en directo.

A concelleira de Cultura, Natividade González, destaca “a boa acollida que tivo a novena edición do Millarock que volveu a contar cunha boa afluencia de público. Esta edición do Millarock estivo marcada polo rock galego e feminino, así como o compromiso social e o rock reivindicativo dos grupos que actuaron. Seguiremos traballando para incluír novas actividades para o que será a décima edición deste festival, que xa está consolidado dentro do panorama musical galego”.

Ligazóns:

El Correo Gallego: "Berro contra o vertedoiro de Casalonga no Millarock amesán"

Compostela 24 horas: "Millarock co compromiso social e o rock máis reivindicativo"