Pestanas principais

Oficina municipal de Voluntariado

    • Enderezo: Casa da Cultura de Bertamiráns. Praza de Chavián s/n
    • Teléfono: 662 37 70 44
    • Responsable municipal: Concellaría de Benestar Social
    • Responsable técnico: Rubén Ramos Domínguez – Técnico de voluntariado
Outros Datos: 

Novas do departamento

Ames achegou aos afectados pola DANA de Valencia 23 pallets de produtos recollidos na campaña solidaria realizada no mes de novembro

O Concello de Ames puxo en marcha o pasado mes de novembro unha campaña solidaria de recollida de alimentos, auga, produtos de limpeza, calcetíns e botas (entre outros bens) para os damnificados pola DANA de Valencia. En total, Ames doou 23 pallets con produtos necesarios que chegaron á Comunidade Valenciana esta semana pasada. As doazóns reunidas na campaña, coordinada en todo momento coa Federación Valenciana de Municipios e Provincias (FVMP), chegaron a Valencia nun camión que saíu dende Bertamiráns.

Apúntate ao novo e innovador obradoiro de relaxación que organiza a Oficina de Voluntariado

O obradoiro de relaxación, organizado pola Oficina de Voluntariado de Ames, dará comezo o próximo 22 de outubro e impartirase todos os martes, en horario de 10.30 a 12.00 horas. As prazas son limitadas polo que é necesario inscribirse chamando ao 662 377 044 ou enviando un correo electrónico ao enderezo voluntariado@concellodeames.gal.

Casi 200 familias de Ames beneficiáronse dos lotes de alimentos e as ceas de Nadal xestionadas pola Oficina de Voluntariado

As campañas solidarias organizadas neste Nadal, conseguiron cifras exitosas grazas á colaboración do voluntariado e da veciñanza de Ames. Deste xeito, conseguiuse reunir algo mais de 400 quilos de alimentos de Nadal, 90 lotes de comida navideña e 120 menús de Noiteboa que se repartiron entre as familias máis vulnerables do concello.

Dende o roupeiro municipal solicitan roupa para bebés, nenos e nenas de ata 12 anos e roupa de cama

A Oficina de Voluntariado de Ames, que xestiona o servizo do roupeiro municipal, solicita unha vez máis a implicación da veciñanza amesá nesta situación económica e sanitaria que se está a vivir. Nesta ocasión, precísase de roupa para nenos e nenas de 0 a 12 anos e roupa de cama de abrigo como mantas, edredóns ou colchas. Existen dous puntos de entrega da roupa, que debe estar embolsada: na Casa da Cultura do Milladoiro e na de Bertamiráns, de 09.00 a 14.00 horas. Lémbrase que a doazón debe ser de roupa nova ou en bo estado.

Dende o roupeiro municipal solicitan roupa para nenos e nenas de 8 a 16 anos

A Oficina de Voluntariado de Ames, que xestiona o servizo do roupeiro municipal, solicita unha vez máis a implicación da veciñanza amesá para recadar roupa para nenos e nenas de 8 a 16 anos. Tamén se informa da necesidade de calzado dende o número 34 ata o 44, mochilas, estoxos, roupa e calzado deportivo (tamén do número 34 ao 44)  para adolescentes e roupa para adultos (tallas grandes). Existen dous puntos de entrega de roupa: na Casa da Cultura do Milladoiro, os martes e venres de 9.00 a 14.00 horas, e na Casa da Cultura de Bertamiráns, os luns, mércores e venres, de 9.00 a 14.00 horas. A partir de agora non é necesario sacar cita previa para poder entregar roupa nas Casas da Cultura. Lémbrase que a doazón debe ser de roupa nova ou que estea en bo estado.

En Ames búscanse Trasnos e Trasnas para a campaña “Zocos e Trasnos 2022-2023”

Dende a Concellaría de Benestar Social informan que este ano debido ao gran número de zocos e zocas precísase que se inscriban máis trasnos e trasnas na sétima edición da campaña “Zocos e Trasnos 2022-2023”. A través desta iniciativa preténdese que ningún neno nin nena de Ames quede sen agasallo no Nadal. A campaña artéllase en base ás cartas que a rapazada (os zocos e zocas), escribe pedindo un regalo concreto. Os veciños e as veciñas de Ames que se apunten como trasnos e trasnas actuarán como “paxes dos Reis Magos” achegando ese agasallo aos “puntos Trasnos” que este ano situaranse nas Casas de Cultura de Bertamiráns e Milladoiro. O departamento de Servizos Sociais, a través da Oficina de Voluntariado do Concello de Ames, é o encargado de organizar a campaña.

Éxito de participación na quinta campaña de Zocos e Trasnos

Neste Nadal, 187 trasnos repartiron os agasallos que pediron case 200 zocos e zocas (nenos e nenas). Anotáronse 25 veciños e veciñas máis que nos anteriores anos, achegando ese agasallo aos dous “Puntos Trasnos”. O departamento de Benestar Social, a través da Oficina de Voluntariado do Concello de Ames, é a encargado de organizar dita campaña.

O 15 de marzo comezan a desenvolverse de novo as actividades do programa Sanauga

En grupos reducidos, e coas restricións e as medidas hixiénico sanitarias que impón a loita contra a COVID19, comezarán a desenvolverse o vindeiro luns, 15 de marzo de 2021, as actividades acuáticas do programa Sanauga. O programa posto en marcha pola Concellaría de Benestar Social, a través da Oficina de Voluntariado (OVA), e cofinanciado pola Deputación da Coruña, está dirixido a persoas maiores e/ou con discapacidade e ten como obxectivos mellorar a mobilidade e o benestar físico dos/as asistentes e mitigar as molestias derivadas de enfermidades musculares e óseas. Sanauga suspendeuse no mes de novembro de 2020 por mor da situación na que se atopaba nese intre a crise sanitaria provocada pola COVID19.

O Banco de reciclaxe electrónica de Ames celebra este sábado o seu primeiro obradoiro para dar nova vida a altofalantes

A recentemente creada Oficina de Voluntariado informático de software libre de Ames, xunto co seu Banco de reciclaxe electrónica, pon en marcha o seu primeiro obradoiro dende o comezo da súa actividade. O servizo, nado da colaboración entre a Concellería de Benestar Social e a Asociación de Empresas Galegas de Software Libre (Agasol), iniciará as súas propostas formativas cun taller de reparación e reciclaxe de altofalantes, que terá lugar este sábado 9 de xullo, de 10:30 a 13:00 horas. As instalacións da oficina están situadas no antigo centro de saúde do Milladoiro, na rúa Agro do Medio, número 8.

O CEIP de Barouta entregou alimentos e produtos de hixiene para o Banco de Alimentos de Ames

O CEIP de Barouta entregou unha gran cantidade de alimentos non perecedoiros e produtos de hixiene para nenos e nenas á Oficina de Voluntariado de Ames, destinados ao Banco Municipal de Alimentos. Os víveres foron recadados ao abeiro da V Carreira Solidaria “Móvome pola paz”, organizada polo centro e celebrada este mes de febreiro. Inicialmente estaba prevista para o 29 de xaneiro con motivo da conmemoración do Día da Paz, pero por motivos meteorolóxicos houbo que adiala. Este ano o obxectivo foi, especialmente, recadar produtos para cubrir as necesidades dos nenos e nenas.

Trámites do departamento

Inscrición como voluntario/a

Eventos del departamento

> Excursión da Oficina de Voluntariado á Fortaleza de Valença

A Oficina de Voluntariado de Ames (OVA), dependente da Concellaría de Benestar Social, organiza unha excursión á Fortaleza de Valença do Minho, en Portugal, que terá lugar o mércores 1 de febreiro. A actividade está dirixida a persoas maiores de 60 anos, e os interesados en inscribirse xa poden facelo, ata o 26 de xaneiro, chamando aos números 683 18 63 44 ou 662 37 70 44. O custo é de 25 euros e inclúe xantar e desprazamento.

> Festa do Entroido Amessan

A Festa do Entroido do programa Amessan celebrarase o venres 17 de febreiro, de 17.30 horas a 20.30 horas, na Casa da Cultura de Bertamiráns. Este ano a temática da festa xira arredor do antigo Oeste e anímase aos maiores a acudir disfrazados. Os asistentes poderán gozar de música ao vivo a cargo de Luis Rey e dunha pequena merenda. Haberá autobuses para asistir ao evento dende as paradas de costume, reservando praza chamando aos números 662 377 044 ou 683 327 378 (antes do 15 de febreiro ás 14:00 horas).

> Obradoiro sobre seguridade dixital básica

A Oficina de voluntariado informático de software libre de Ames, xunto co seu Banco de reciclaxe electrónica, continúa coa programación de obradoiros que comezou no pasado mes de xullo. Nesta ocasión o sábado, 1 de outubro, de 11:00 a 13:30 horas, impartirase no edificio do antigo centro de saúde do Milladoiro un obradoiro sobre seguridade dixital básica. Trátase de impartir actividades de divulgación das novas tecnoloxías en software libre entre os grupos sociais menos favorecidos. Aprenderase sobre conceptos básicos da seguridade dixital, para poder usar os nosos ordenadores e smartphones dunha forma mellor e máis segura. As persoas que queiran participar poden confirmar a súa asistencia premendo nesta ligazón.

>Feira do Voluntariado

A I Feira do Voluntariado de Ames rematará o sábado 29 de maio. Podes consultar aquí o programa de actividades. Tamén podes coñecer o horario, as persoas e os temas dos faladorios. A xornada comezará ás 11.00 horas coa actividade "Move o teu corpo", dirixida por BJ trainers. Ao longo do día haberá obradoiros infantis, para adultos, faladorios... Ás 20.00 horas clausurarase a Feira do Voluntariado cun concerto de Arévalo Gianneto Rock Soul.

>Inauguración da mostra de pinturas de Marité Lamas Domínguez

Este venres, 3 de xullo, inaugurase na Casa da Cultura de Bertamiráns a mostra de pinturas de Marité Lamas Domínguez. Unha serie de interpretacións realizadas en acrílicos, lapis e acuarelas, durante os primeiros corenta días da corentena mundial 2020.