[10-01-2011] Esta mañá deron comezo as obras de remodelación da rúa Viorneira do Milladoiro. Os traballos teñen como obxectivo a entrada nesta rúa desde a Avenida Rosalía de Castro e a Nacional 550. As obras, que terán un custo de 13.000 euros, incluirán reformas nas instalacións eléctricas, sumidoiros das augas pluviais, farois e beirarrúas e rematarán previsiblemente o martes 18.

[09-01-2011] Un ano máis os índices de poboación de Ames continúan subindo chegando neste momento aos 28.955 habitantes. Deste xeito aumenta a cifra con respecto ao ano pasado en preto de 1.000 novos veciños e veciñas e achegándose aos 29.000. Do total de habitantes censados en Ames son algo máis de 20.000 os que se atopan en idade de traballar e máis de 6.300 os que se atopan na franxa situada entre os 0 e os 18 anos. Con respecto á poboación procedente de fóra do concello, son 1.769 os estranxeiros procedentes doutras localidades de España e doutros países europeos, americanos, africanos e asiáticos. Estes datos non son definitivos, pois para completar os datos anuais faltan por contabilizar as altas e baixas dos meses de outubro, novembro e decembro de 2010, polo que o censo oficial de 2010 coñecerase o 1 de marzo de 2011.

[08-01-2011] Desde actividades de limpeza e desbroce ata o acondicionamento de recintos para actos oficiais ou de asociacións, estes son algúns dos traballos que levou a cabo a brigada municipal de obras do Concello de Ames desde maio de 2010. En total, arredor de 6.500 intervencións deste equipo fixeron máis cómoda a vida dos veciños e veciñas de Ames. Os traballos desta brigada están compostos por partes de traballo que son xerados maioritariamente por chamadas feitas ao Concello, por revisións de persoal dependente da concellería de Obras, tamén por peticións solicitadas no rexistro do Concello, por informes da Policía local, por notas internas e en contadas ocasións por chamadas de estrema necesidade a través da escala superior de mando do Concello. Esta brigada conta con máis dunha vintena de persoas en permanente actividade ao longo do ano.

[07-01-2011] O Concello de Ames apoia economicamente actuacións, investimentos e a dotación de infraestruturas das diferentes entidades educativas do concello que redunden na mellora da calidade educativa. Unha das colaboracións establecidas é a subvención para actividades e investimentos levadas a cabo por ANPAS e centros de ensino. O goberno municipal acaba de aprobar a concesión dun total de 26.790 euros entre 10 entidades educativas de Ames. Estas entidades terán de prazo ata o 21 de xaneiro para xustificar o gasto polo que recibiron a devandita subvención.