[13-01-2011] "¿Canto falta por chegar?", "As viaxes espaciais", "Non ancho mar, guía para non perderse", "Viaxe dantesca a outro mundo", "Viaxes virtuais e viaxes solidarias", "Percorridos sonoros" e "Viaxe ao imperio dos sentidos" son algúns dos títulos das charlas que os profesores e profesoras do IES de Ames ofrecerán ao longo deste curso dentro do Ciclo de Exposicións Complementarias que organiza o departamento de Filosofía e que este ano leva como título xenérico "A volta coas Viaxes". O ciclo comezou onte no pazo da Peregrina. Na sesión inaugural interviñeron, ademais da profesora Eva Garea, primeira das conferenciantes, o profesor Juan Yürs que presentou o acto, a directora do IES, Marisol Louro e o alcalde Ames Carlos Fernández. Un grupo de alumnas de grego recitou no idioma helénico un poema de Kavafis que fala da importancia do percorrido fronte á meta. O Concello colabora con esta actividade do Instituto cedendo o pazo da Peregrina para as conferencias ás que está convidada toda a comunidade educativa e a veciñanza de Ames e que terán lugar os mércores ás seis e media da tarde.

[12-01-2011] Aberta desde 2003, a Aula de Informática do Milladoiro suma xa arredor de 2500 socios, dos cales 63 foron novas altas ao longo do ano pasado. Ademais, máis de 1900 persoas empregaron a aula en 2010 par as súas necesidades informáticas. Os meses de mellor tempo son, como é normal, os que rexistran un menor número de usuarios e socios. A aula permaneceu pechada só no mes de setembro por vacacións e permitiu aos usuarios ter acceso a un ordenador no que consultar o correo electrónico ou o xornal e levar a cabo as actividades do seu interese. Inserir a veciñanza de Ames na Sociedade da Información é o principal obxectivo deste servizo.

[11-01-2011] O inverno chega a Ames cargado de actividades culturais para a veciñanza. O teatro, o cine, obradoiros e actividades deportivas son parte dunha oferta completa dirixida a todos os públicos que continuará ao longo de tres meses. Tamén haberá tempo para coñecer outras zonas de Galicia con excursións fóra do Concello, e darase a posibilidade a persoas de fóra da nosa Comunidade de aprenderen a nosa lingua e cultura.

[11-01-2011] A Biblioteca Municipal de Ames fai xirar a súa programación de xaneiro arredor dun concepto tan importante como a paz, un valor para as xeracións máis novas que poderán aprender sobre esta ao longo destes días. Obradoiros e contacontos achegarán a importancia da paz aos cativos de Ames. O lema da campaña é "Xaneiro: só tres letras, PAZ".