Este martes, 22 de abril, o alumnado do IES de Ames, situado na localidade de Bertamiráns, participou na campaña “Agresión off, eu digo non á violencia sexual” da Xunta de Galicia. A través de diferentes actividades os mozos e mozas amesáns participaron en varias dinámicas de xogo co obxectivo de interiorizar os conceptos de sensibilización contra a violencia de xénero e as violencias sexuais de xeito lúdico. Esta actividade foi solicitada á Xunta de Galicia dende o Centro de Información á Muller (CIM) co obxectivo de sensibilizar e concienciar sobre a importancia de rachar coas condutas violentas e non igualitarias, tanto nas relacións persoais como sociais.

A Xunta de Goberno Local vén de aprobar a adxudicación das obras de mellora do edificio da Escola Municipal de Música de Ames. As obras contemplan actuacións de substitución e mellora da cuberta do edificio e maila adecuación dunha estancia para as dependencias do persoal da Agrupación de Protección Civil no citado edificio. Ditas obras foron adxudicadas á empresa Construcciones D. Ogando SL por un importe de 245.302,01 euros (IVE incluído). Dita actuación está incluída na segunda fase do POS+ Adicional. Este proxecto foi aprobado no pleno ordinario do mes de xullo de 2024.

Este vindeiro martes, 22 de abril, poñerase o peche final a unha nova edición do programa Abril de Cine, unha iniciativa enmarcada dentro da programación deseñada polo departamento de Cultura do Concello de Ames e que nace coa finalidade de achegar o cinema galego á veciñanza. Desta volta, as protagonistas serán as curtametraxes, pois nesta última xornada do ciclo de cine proxectaranse catro curtas de temáticas diferentes mais con varios nexos en común. A sesión terá lugar ás 20.00 horas no auditorio do Milladoiro e contará coa presenza dos directores de cada unha das curtas. As entradas xa se poden adquirir a través da Billeteira electrónica do Concello de Ames.

No pasado mes de febreiro comezou a impartirse o curso de monitor/a de actividades de tempo libre organizado pola Concellaría de Mocidade, unha formación na que este ano están a participar 25 persoas. Ao  longo destes dous meses que levan de aprendizaxe, os participantes xa realizaron diferentes actividades na modalidade presencial do curso, destacando a acampada nas instalacións da Aula da Natureza que tivo lugar a fin de semana dos días 5 e 6 de abril.