O Concello de Ames instalou, no mercado de rúa de Bertamiráns, unha carpa con información sobre o proxecto de compostaxe de residuos orgánicos municipais. O obxectivo era concienciar sobre a importancia de facer unha boa separación do residuo orgánico e que a veciñanza poida coñecer o proceso da compostaxe. Un proceso que despois de seis meses de elaboración, coñécense agora os seus primeiros resultados. Neste reparto participaron o concelleiro do Medio Rural, Manuel Lens, a técnica de Medio Ambiente, Patricia Reboreda, e representantes de ADEGA.

A Casa Escola Obradoiro da palilleira amesá, Ana Rosa Lista, está na actualidade impartindo clases de encaixe galego popular no centro social A Nosa Galicia de Xenebra. A palilleira amesá, que é mestra de encaixe da Xunta de Galicia, estará en Suíza ata o 22 de outubro ofrecendo este obradoiro a 17 alumnas en horario de tarde. Ademais, acudiu a semana pasada ao IES Luís Seoane, de Pontevedra, para presentar a exposición na que reproduciu 17 cadros do pintor e xornalista, Luís Seoane, feitos con mistura de encaixe e pintura. O Concello ten a intención de poder expoñer esta mostra proximamente en Ames.

A localidade do Milladoiro acolle este sábado, 12 de outubro, a primeira edición da Ruta Biker Aultruísta “Animalíate”, un evento solidario que se desenvolverá na contorna da Casa da Cultura  e do pavillón polideportivo. A Asociación Ángeles caídos sobre ruedas e o grupo Bikersolitari@s, en colaboración co Concello de Ames, organizan esta xornada na que haberá un mercadillo e cea solidaria, diferentes exposicións, exhibicións e música. Ao longo de toda a xornada haberá diferentes actividades: mercado solidario, actuacións musicais, exposición de motos e de de Agilitty, etc.

A concelleira de Benestar Social, Luísa Feijóo, asistiu esta mañá á Asemblea Xeral de socios do Fondo Galego de Cooperación e Solidariedade, onde se aprobou por unanimidade a composición da Comisión Executiva, que rexerá a entidade nos próximos catro anos. O Concello de Ames pasa a ocupar unha das vogalías da Comisión Executiva. O Concello de Nigrán renova a Presidencia na persoa do alcalde, Juan González, mentres que a Vicepresidencia será para a concelleira de San Sadurniño Ana Breixo e a Tesourería para o concelleiro de Cartelle Daniel Fernández Carril. O resto de vogalías corresponden aos concellos de Oleiros, Santiago de Compostela, Moraña e Deputación de Lugo. A Secretaría continuará exercéndoa o Instituto Galego de Análise e Documentación Internacional (Igadi), impulsor da iniciativa nos anos 90.