A Concellaría de Benestar Social informa á veciñanza amesá de que unha unidade móbil do Centro de Transfusión de Galicia (CTG) estará o día 10 no Milladoiro e o día 11 en Bertamiráns. No Milladoiro, o vehículo estacionará na rúa Cruxa, na intersección coa rúa Rosalía de Castro; mentres que en Bertamiráns estará ao carón da praza da Maía. En calquera das dúas localidades, os doantes poderán achegarse en horario de 15.30 a 21.00 horas. Lémbrase que se deberá acudir en posesión da tarxeta de doante ou do DNI ou un documento identificativo similar. O Concello de Ames colabora coa campaña solidaria da Axencia Galega de Doazón de Sangue e Órganos #súmatedoasangue.

Este vindeiro sábado, 12 de outubro, a partir das 10.00 horas, celebrarase a quinta edición do Camiño da Diversidade, que organiza a Fundación Ingada (Instituto Galego do TDAH e Trastornos Asociados). Os/as participantes sairán da Escravitude (Padrón) para percorrer parte da ruta portuguesa ata a praza do Obradoiro. Esta mañá no Pazo de Raxoi, en Santiago de Compostela, realizouse a presentación desta quinta edición do Camiño da Diversidade.

A Casa da Cultura de Bertamiráns acolle este venres, 11 de outubro, a obra de teatro infantil, Comenoites, da compañía Os Náufragos Teatro. A obra entra dentro do convenio de colaboración entre a Axencia Galega de Industrias Culturais e o Concello de Ames, na programación da Rede Galega de Teatros e Auditorios. Esta baséase no conto infantil escrito e ilustrado por Ana Juan (Premio Nacional de Ilustración). Haberá dúas sesións: a primeira ás 17.00 e a segunda as 18.00 horas. As entradas, que poden adquirirse a través da Billeteira electrónica, teñen un custo de 4 euros en tarifa xeral e 2 euros na reducida.

O Concello de Ames pon en marcha o programa de conciliación Nadal Lúdico, dirixido aos nenos e e nenas escolarizados no segundo ciclo de Educación Infantil e Educación Primaria que se encontren empadroados no Concello de Ames. Este programa, que terá lugar os días 23, 24, 26, 27, 30, 31 de decembro de 2019, e o 2, 3 e 7 de xaneiro de 2020, ten como finalidade ofertar unha alternativa que permita as nais e pais conciliar vida laboral e familiar, ocupando o tempo de lecer dos máis pequenos de maneira divertida e educativa.