Dende este martes, 1 de abril, estará aberto o prazo de solicitude de praza para o curso 2025-2026 nas escolas infantís de titularidade municipal (O Bosque, en Bertamiráns, e A Madalena, no Milladoiro). As solicitudes poderán presentarse ata o vindeiro 15 de abril. Posteriormente, os/as admitidos/as deberán formalizar a matrícula entre o 1 e o 16 de xuño. A documentación que hai que presentar para solicitar praza pode descargarse preferentemente a través da páxina web conciliames.gal, ou ben recollerse nas dependencias das escolas.

O Concello de Ames abre ata o 31 de marzo o prazo para que as persoas usuarias dos servizos complementarios de educación e conciliación poidan preinscribirse ou renovar praza para o vindeiro curso 2025-2026, na Rede de Comedores Escolares e nos programas Bos Días Cole e Tardes Divertidas. As persoas interesadas poden realizar a tramitación administrativa das súas solicitudes a través da páxina web de Conciliames, presentando a documentación asinada dixitalmente na Sede electrónica do Concello de Ames. Tamén poden entregala en papel nas oficinas de asistencia en materia de rexistro do Concello de Ames. Ademais, as persoas sen Internet poden solicitar asistencia presencial chamando ao 981 891 476.

Dende este venres, 14 de febreiro, e ata o venres 28 de febreiro, estará aberto o prazo para inscribirse no servizo de conciliación “Primavera Lúdica”, que se desenvolverá os días 14, 15, 16 e 21 de abril de 2025. No programa poderán participar familias empadroadas no Concello de Ames, con nenos e nenas escolarizados no segundo ciclo de educación infantil ou de primaria no curso 2024-2025, e que acrediten a necesidade de conciliar a vida laboral coa familiar. A “Primavera Lúdica” ten un horario de 7:30 a 16:00 horas, e inclúe os servizos de comedor e Bos Días. As familias interesadas deberán entregar a documentación necesaria na Sede electrónica do Concello de Ames, ou nas oficinas de asistencia en materia de rexistro do Concello de Ames (O Milladoiro e Bertamiráns).

Na mañá deste xoves 30 de xaneiro, o CEIP de Barouta celebrou outra edición da carreira solidaria “Móvome pola paz”, unha iniciativa motivada pola conmemoración do Día Internacional da Paz. Nesta xornada participaron en total 400 persoas, entre eles, alumnado do propio CEIP de Barouta, xunto co alumnado de sexto de Eduación Primaria do CEIP da Maía e Agro do Muíño e os pequenos da unitaria de Covas. O obxectivo desta iniciativa é a recollida de alimentos e produtos de primeira necesidade para o banco de alimentos municipal, xunto coa recollida de fondos para a emerxencia en Gaza. As persoas interesadas en facer unha doazón, poderán deixar os seus produtos no centro educativo ata finais da semana que vén.