A empresa de xoiería artesanal galega, Silvereira, cumpre un cuarto de século a finais deste ano 2025. O alcalde, Blas García, visitou xunto á concelleira de Promoción Económica e o concelleiro de Obras e Servizos básicos ás instalacións da empresa amesá, situadas en Raíces, parroquia de Biduído. Juan Lamas e Marta Ares acompañáronos polo taller e explicáronlle os procesos que seguen para a fabricación das distintas pezas. Ambos destacaron a importancia da modernización dos procesos de fabricación para optimizar recursos e tempo e, deste xeito, ser competitivos.

O Concello de Ames, xunto coa Unión de Consumidores de Galicia (UCGAL), presentou na mañá de hoxe o informe sobre os datos de consumo nas oficinas municipais nesta materia no pasado ano. Deste xeito, as oficinas da UCGAL situadas nas localidades de Bertamiráns e do Milladoiro recibiron ao longo de todo 2024 un total de 425 consultas, producíndose a maior parte no primeiro semestre do ano e no sector financeiro. A oficina da UCGAL do Milladoiro, localizada na Rúa Viorneira, ofrece atención os martes en horario de 10.00 a 14.00 e de 16.30 a 20.30, mentres que a de Bertamiráns, situada no Pazo da Peregrina, está aberta os xoves, co mesmo horario de atención. O teléfono para poñerse en contacto coas oficinas da UCGAL no noso concello é o 662 130 312.

O Concello de Ames presentou esta mañá a cuarta edición de InnovAmes, unha xornada de innovación para as empresas amesás e afincadas no noso concello. Este ano terá lugar o vindeiro venres 7 de marzo no pavillón deportivo do Milladoiro e ao longo de toda a xornada haberá diferentes conferencias, obradoiros e exposición de stands, xunto coa xa habitual entrega dos premios InnovAmes tanto a empresas innovadoras como a proxectos educativos. O obxectivo deste evento é achegar á cidadanía as últimas tendencias dentro do mundo da innovación e desenvolvidas por empresas do Concello de Ames, xunto coa creación dun espazo no que compartir coñecemento e crear novos enlaces para posibles novos proxectos entre empresas.

A Casa do Concello acolleu este martes, 11 de febreiro, o acto de entrega de premios ás persoas gañadoras do XIX concurso de escaparates de Nadal e do III concurso de decoración de Nadal veciñal. O alcalde de Ames, Blas García, e a concelleira de Promoción Económica, Ana Belén Paz, xunto cos membros do xurado, Lucía Rodríguez e Félix Caramés, foron os encargados de repartir os galardóns. En total repartíronse 6.000 euros entre os gañadores/as. No concurso de escaparates repartíronse catro premios dotados cun total de 4.000 euros (1.500 euros para o primeiro, 1.100 para o segundo, 800 para o terceiro e 600 para o cuarto), mentres que no concurso de decoración veciñal repartíronse outros catro premios de 500 euros cada un.