A Aula da Natureza vén de organizar o sábado 23 e o domingo 24 de abril unha excursión de fin de semana aos Ancares, onde se completaron as rutas ambientais dos Tres Bispos e dos Cabanillos, e se visitou a aldea do Piornedo e as súas pallozas prerromanas. Ademais, a rapazada amesá gozou o pasado sábado 7 de maio dunha xornada especial centrada na Festa dos Maios, na que se repartiron tarefas e traballaron en equipo para elaborar os maios e coñecer mellor esta celebración tradicional.

Esta mañá realizouse nos concellos de Santiago de Compostela e de Ames un simulacro de emerxencia por incendio forestal, no cal se activou o Plan especial de protección civil ante emerxencias por incendios forestais na comunidade autónoma de Galicia (PEIFOGA) en situación 1 e o paso a situación 2. O simulacro desenvolveuse nos lugares de Roxos (parroquia de Villestro, pertencente ao concello de Santiago de Compostela), e na urbanización de Aldea Nova (parroquia de Ortoño, no concello de Ames). Comezou ás 8:45 cun incendio de nivel 1 na zona de Roxos, que ao non poder ser controlado, pasou ao nivel 2, arredor das 11.00 horas.

A Aula da Natureza organizou esta fin de semana unha serie de actividades nas que a veciñanza amesá puido coñecer mellor as plantas cotiás ou medicinais propias do concello. Deste xeito, unha exposición con arredor de 70 plantas diferentes, recollidas en Ames nas xornadas previas, ocupou a Casa da Cultura de Bertamiráns con información sobre as súas propiedades e os seus usos populares. Ademais, na mañá de sábado unha ducia de persoas gozaron dunha ruta botánica pola contorna do Pedregal e de Bertamiráns, na que descubriron e recolleron algunhas destas plantas. Por último, o parque do Ameneiral acolleu un taller sensorial para familias con bebés de entre seis meses e dous anos, no que puideron experimentar cos seus sentidos xogando con auga, area, terra, madeira ou algodón, entre outros materiais.

A Aula da Natureza propón para esta semana dúas propostas protagonizadas polas plantas cotiás, tamén coñecidas como medicinais, para que a veciñanza amesá coñeza as súas propiedades e saiba recoñecelas na natureza. Este venres 13 de maio instalarase unha exposición de plantas medicinais na entrada da Casa da Cultura de Bertamiráns, con varias visitas guiadas e proxeccións de vídeos ao longo da xornada. Ademais, na mañá do sábado 14 farase unha ruta botánica guiada polos arredores da Aula da Natureza, que contará con servizo de autobús dende O Milladoiro e Bertamiráns. Para participar nas actividades, cómpre enviar esta ficha de inscrición cuberta e asinada ao enderezo electrónico auladanatureza@concellodeames.gal.