Trinta e seis alumnas e alumnos de sexto de primaria do CEIP de Barouta visitaron na mañá do pasado venres 4 á brigada de repoboación forestal de Ames, que preparara uns terreos en Montemaior para explicar o seu labor á rapazada. Alí, os nenos e nenas plantaron árbores frondosas caducifolias e coñeceron o funcionamento das faixas secundarias do plan de prevención de lumes, que neste curso actuará nas zonas de Montemaior, Ventosa, A Condomiña e A Tarroeira.

A Aula da Natureza presentou na mañá deste luns o seu itinerario para os meses de febreiro a maio, que inclúe propostas para todos os públicos e idades. Haberá excursións, cursiños e talleres no propio espazo da Aula, na que a veciñanza gozará e aprenderá máis sobre o entorno. Este sábado 5 comezan xa as actividades, cunha xornada dedicada á Festa da Luz para nenas e nenos dos 6 aos 12 anos, para a que xa se pode solicitar praza, enviando a ficha de inscrición ao enderezo auladanatureza@concellodeames.gal. A programación ao completo pode consultarse premendo nesta ligazón.

O Concello de Ames presentou o pasado xoves 16 de decembro a quinta fase do seu plan de prevención de incendios forestais, que durante este inverno poderá actuar en ata dez hectáreas de terreos no ámbito da Condomiña e da Tarroeira. A veciñanza destas zonas recibiu as explicacións de persoal técnico do departamento de Medio Ambiente e de membros da brigada forestal municipal, nunha reunión á que asistiron o alcalde de Ames, Blas García, e o concelleiro de Transición Ecolóxica e Medio Ambiente, Manuel Lens. O plan de prevención, posto en marcha en 2017, consiste na plantación de árbores frondosas caducifolias para formar faixas de seguridade contra os lumes, protexendo aos núcleos de poboación e mellorando a biodiversidade.

Co avance da vacinación e a evolución epidemiolóxica volveron as actividades grupais aos colexios e institutos amesáns, cos que a Aula da Natureza está colaborando nestas últimas semanas. O IES de Ames, o CEIP de Barouta e a Escola Unitaria de Covas son os centros nos que traballou a Aula, respondendo ás solicitudes de colaboración do alumnado e dos equipos docentes e directivos, e realizando diversas accións de intervención medioambiental que tamén crean comunidade. “As saídas son un xeito máis de compartir cos compañeiros e compañeiras, de socializar, de respectar quendas e momentos e de construír algo xuntos en comunidade”, sinalou Silvia Seoane, mestra da EEI de Covas.