O Concello de Ames organiza para todos os veráns un programa de campamentos municipais. Este ano houbo varias novidades. Deste xeito, ampliouse a oferta da Concellaría de Transición Ecolóxica respecto dos campamentos urbanos que se desenvolven nas instalacións da Aula da Natureza. O programa de campamentos municipais rematou o pasado 5 de setembro coa finalización do campamento que se realizou na Granxa escola O Kiriko, en Fornelos de Montes. Entre os campamentos dirixidos ao alumnado de primaria, secundaria e bacharelato, así como a rapazada que participou nas actividades da Aula da Natureza, en total este verán participaron neste programa 228 rapaces e rapazas.

A Asociación veciñal “O Cantiño” de Quistiláns e a Plataforma pola recuperación do Río Sar, convocan á veciñanza a unha andaina-limpeza do Río do Pego que se desenvolverá o sábado 1 de agosto a partir das 19:00 horas. Con esta acción pretenden reivindicar esta paraxe de gran riqueza natural, antropolóxica, inmaterial e patrimonial e poñer o foco de atención sobre a necesidade de coidar o río e non emporcar de lixo as súas augas. Calquera persoa que queira colaborar deberá levar máscara e luvas. O Concello, a través da Concellaría de Transición Ecolóxica, apoia a iniciativa e anima á veciñanza a participar dela.

Ao redor dun cento de rapaces e rapazas de primaria de Ames desfrutan este ano dos campamentos de verán que organizou  a Aula de Medio Ambiente en varios espazos especializados neste tipo de actividades. A rapazada  comparte experiencias na natureza, fai rutas de sendeirismo, visita lugares novos, practica deportes de auga, participa en xogos cooperativos e veladas nocturnas. Este ano os campamentos elixidos foron: “Corazón de Carballo” en Tomiño, “Naturmaz” en Mazaricos, “Alvarella” nas Fragas do Eume e “O Terrón”, en Vilanova de Arousa. Está pendente que 50 rapaces e rapazas viaxen a “El Kiriko” en Fornelos de Montes, un dos campamentos estrela aos que leva acudindo a rapazada de Ames desde hai anos. A estadía será do 31 de agosto ao 5 de setembro e poderán acudir rapaces e rapazas de 6 a 14 anos. Aínda quedan prazas dispoñibles. Quen queira apuntarse pode facelo até o día 31 de xullo, enviando un correo a auladanatureza@concellodeames.gal. Cómpre salientar que este verán extremáronse as medidas de seguridade e de prevención da COVID19.

“Calma e que cada un actúe segundo o plan previsto”. Así se pronunciaba  o alcalde, José Miñones, na presentación do Plan de Prevención de Incendios que onte reuniu no pazo da Peregrina a unha vintena de persoas implicadas na loita contra o lume no Concello de Ames. O Plan determina a categoría dos lumes segundo a súa gravidade, contempla os pasos que se deberán dar en cada un dos casos, recolle o inventario de medios propios e concertados dos que dispón o Concello, fai un resume da loxística que se debe seguir e reúne os contactos e teléfonos das persoas e grupos involucrados nesta lide contra o lume. Un mapa de ruta que, sen dúbida,  facilitará a actuación de cada un dos sectores implicados en caso de producirse un incendio no noso Concello.