O programa "En Ames, Naturalmente" busca que as nenas e nenos volvan a relacionarse con persoas da súa idade a través da natureza. Os campamentos, que se realizarán en diferentes quendas entre os meses de xuño e xullo nas instalacións da Aula da Natureza do Concello de Ames, están destinados ao alumnado de Educación Primaria e Educación Secundaria. Cada quenda conta con 30 prazas e o seu prezo é de 50 euros. Para realizar a preinscrición, compre enviar un correo electrónico a auladanatureza@concellodeames.gal no caso dos campamentos de Educación Primaria e omix@concellodeames.gal no caso dos campamentos destinados a Educación Secundaria.

O Concello de Ames informa de que, no día de hoxe,  publicouse a Orde do 27 de abril de 2020 pola que se modifica a Orde do 23 de marzo de 2020 pola que se adoptan medidas de carácter obrigatorio en relación coa Covid-19, en cumprimento do acordo do Centro de Coordinación Operativa da Emerxencia Sanitaria na Comunidade Autónoma de Galicia (Cecop), do 18 de marzo, sobre a venda directa de produtos agrogandeiros nos mercados, a venda de produtos vexetais para a plantación en hortas de consumidores finais e o desprazamento de agricultores e viticultores para os efectos da realización de actividades agrarias. Os principais cambios afectan a aquelas persoas con cultivos e viñedos considerados de autoconsumo (fins non comerciais), xa que agora poderán desprazarse dentro do termo municipal para levar a cabo as tarefas de mantemento e atención dos seus cultivos e viñedos e, en caso de que se encontre noutro termo municipal, este desprazamento poderá facerse ate unha distancia de 5 km dende a súa vivenda habitual.

Coa intención de facer máis levadeiro este período de confinamento, a Aula da Natureza do Concello de Ames irá publicando na páxina web municipal diferentes actividades para realizar na casa. Desta volta, proponse un obradoiro artesanal de xabón, co que as familias poderán elaborar os seus propios xabóns coñecendo as particularidades e gamas que ofrece a súa realización. Ao pé desta nova podes acceder ás instrucións e coñecer máis en profundidade as características desta primeira actividade para realizar no fogar. A elaboración do xabón correrá a cargo dun adulto, mentres que os nenos e nenas da casa poderán colaborar nunha segunda fase de acabado e ornamentación.

O Concello de Ames, a través da Concellaría de Transición Ecolóxica e do Medio Rural, comezou neste mes de marzo a facer o reparto do material para o trampeo da avespa velutina. O persoal do departamento de Medio Ambiente será o encargado de ceder 100 trampas e 100 unidades de líquido atrainte de raíñas. Ao tempo que se fai cesión de dito material achegarse unhas instrucións básicas sobre a colocación  das trampas e a utilización do líquido atrainte. Dende o Concello farase un seguimento e avisarase, unha vez finalizado o período de trampeo, sobre a conveniencia de retirar as trampas para non danar outras especies.