Actualidade
Martes, 10 de outubro de 2023
O parque do Ameneiral, en Bertamiráns, acolleu esta mañá a presentación dunha das novidades da programación de outono da Aula da Natureza, as camiñadas teatralizadas polo rego da Andoriña, “O segredo da andoriña”, que se celebrarán os días 21 de outubro e 12 de novembro. Para anotarse nesta actividade, que ten como obxectivo mostrar o valor histórico e paisaxístico das parroquias de Tapia e Piñeiro, é preciso enviar o impreso de inscrición que se pode descargar premendo nesta ligazón ao enderezo auladanatureza@concellodeames.gal. Ao acto asistiron o alcalde de Ames e edil de Turismo, Blas García; o concelleiro de Medio Ambiente, Javier Antelo; a concelleira de Promoción da Saúde e Deportes, Susana Señorís, e persoal técnico municipal. Tamén acudiu Tero Rodríguez, en representación da compañía teatral Os Quinquilláns.
Luns, 09 de outubro de 2023
Este pasado domingo, 8 de outubro, comezaron as actividades de outono organizadas pola Aula da Natureza. Un grupo de 35 persoas participaron nunha saída para recoller cogomelos. Estas saídas continuarán durante o mes de novembro polas parroquias de Lens, Ameixenda e Agrón. A seguinte actividade que se recolle na programación é unha saída para recoller castañas que inclúe un magosto e unha charla – coloquio. Será o sábado 14 de outubro na parroquia de Piñeiro. Para inscribirse nesta e noutras actividades hai que enviar o impreso de inscrición ao enderezo auladanatureza@concellodeames.gal. A programación ao completo pode consultarse premendo nesta ligazón.
Martes, 03 de outubro de 2023
A Aula da Natureza vén de presentar a programación de actividades para este outono. Durante os meses de outubro e novembro vai a realizar diferentes actividades relacionadas con produtos e costumes propias desta época do ano. Deste xeito, haberá saídas para recoller castañas e cogomelos, unha acampada na Aula da Natureza, rutas teatralizadas polo rego da Andoriña, obradoiros para elaborar conservas de froitas e hortalizas e maila terceira edición da feira do monte Tanto Monte, Monte Tanto. Para inscribirse nestas actividades hai que enviar o impreso de inscrición ao enderezo auladanatureza@concellodeames.gal. A programación ao completo pode consultarse premendo nesta ligazón.
Luns, 25 de setembro de 2023
O Concello de Ames participou este domingo pasado, 24 de setembro, na actividade “Móllate polos ríos”. Coordinada pola Asociación para a Defensa Ecolóxica de Galicia (ADEGA), esta actividade consistiu na limpeza simultánea de lixo en distintos ríos e regatos de Galicia. As 30 persoas voluntarias que participaron en Ames percorreron dous quilómetros de diferentes tramos de ríos e regatos que pasan polo concello amesán. Deste xeito, limparon 500 metros de cada un destes ríos e regatos: Ameneiral, Rego dos Pasos, Tambre e Rego do Andoriña. O rango de idade das persoas participantes foi diversos, incluíndo voluntarios/as dos 2 ao 60 anos. A limpeza realizouse durante dúas horas e destacou a significativa participación de adolescentes e rapaces e rapazas. En xeral, todas as persoas que participaron na actividades mostraron un grande interese na limpeza dos ríos e coidado do medio natural.
Luns, 18 de setembro de 2023
O Concello de Ames participa novamente na iniciativa “Móllate polos ríos”. Coordinada pola Asociación para a Defensa Ecolóxica de Galicia (ADEGA), a actividade consiste na limpeza simultánea de lixo en distintos ríos e regatos de Galicia. Dende a Concellaría de Medio Ambiente e Rural convídase á veciñanza amesá a participar desta iniciativa, que se desenvolverá este domingo, 24 de setembro, a partir das 10:30 horas, facendo unha limpeza dos regos do Ameneiral e Pasos. Para inscribirse nesta actividade hai que enviar a ficha de inscrición ao enderezo auladanatureza@concellodeames.gal
Martes, 29 de agosto de 2023
Este verán 2023, a Aula da Natureza do Concello de Ames ofreceu distintos campamentos para nenos e nenas da etapa de Primaria, tanto con estadía nocturna como urbanos. En total, houbo 289 participantes de tódolos cursos. Esta oferta lúdica busca dotar á cativada das ferramentas precisas para lograr a súa autonomía e independencia, e fomentar a convivencia, a cooperación, e o respecto; ao tempo que se achega aos nenos e nenas ao medio natural, ao deporte e á cultura.
Xoves, 24 de agosto de 2023
O Concello de Ames realizará actuacións proximamente nos parques caninos de Milladoiro e Bertamiráns para o acondicionamento e a mellora das instalacións.
Luns, 14 de agosto de 2023
O centro de depósito de residuos do Punto Limpo rexistrou 747 entradas en xullo de 2023. Durante o pasado mes destaca a achega de 3.622 quilogramos de equipos eléctricos e electrónicos, 72 pneumáticos fóra de uso, 84 aerosois e 600 unidades de pilas. O Punto Limpo, inaugurado en xaneiro de 2007, está situado na rúa das Hedras, no parque empresarial do Milladoiro, e abre de luns a sábado de 9:00 a 15:00 horas e de 16:00 a 20:00 horas.
Luns, 07 de agosto de 2023
O alcalde de Ames, Blas García, e o concelleiro de Xestión do Medio Natural, Javier Antelo, reuníronse co director xeral de Defensa do Monte, Manuel Rodríguez Vázquez, para facilitar a xestión da biomasa de máis de 30 hectáreas de monte e 30 quilómetros de vías nas denominadas faixas secundarias, é dicir, aquelas máis próximas ás vivendas.
Luns, 17 de xullo de 2023
Do 3 ao 14 de xullo desenvolveuse a primeira das quendas do campamento urbano que organiza a Aula da Natureza do Concello de Ames. Unha vez máis, completáronse as 25 prazas ofertadas, e tivo que elaborarse unha lista de agarda con cativada que non resultou escollida por sorteo para participar. Os rapaces e rapazas que gozaron desta quenda participaron en diversos obradoiros de eido ambiental e en saídas para descubrir as posibilidades que ofrece a natureza. Así mesmo, organizáronse diversas xornadas lúdicas realizando visitas dentro e fóra do concello. Este luns, 17 de xullo, comeza a segunda quenda do campamento urbano con outros 25 participantes. As actividades impartiranse ata o venres 28 de xullo.
- ‹ anterior
- 7 de 23
- seguinte ›