Actualidade
Martes, 15 de novembro de 2022
A Aula da Natureza está desenvolvendo numerosas actividades dentro da súa programación de outono. Nesta ocasión prepárase un obradoiro de elaboración de xoias artesanais que se crearán a partir de materias atopadas no monte. Organízanse dúas sesións: unha para adultos, que terá lugar este sábado 19 de novembro, e outra para rapaces e rapazas de entre 10 e 16 anos, que será o sábado 26. Para ambas haberá servizo de autobús dende O Milladoiro e Bertamiráns. O prazo para anotarse xa está aberto, e para participar só é necesario enviar a ficha de inscrición ao enderezo electrónico auladanatureza@concellodeames.gal.
Xoves, 03 de novembro de 2022
A Aula da Natureza organiza unha nova actividade dentro da súa programación deste outono. Trátase dun obradoiro de artesanía no que cada participante elaborará o seu propio tapiz con fibras naturais e nós de macramé. O taller terá lugar os días 12 e 13 de novembro nas instalacións da Aula, no lugar de Quintáns, pertencente á parroquia da Ameixenda, e haberá servizo de autobús dende O Milladoiro e Bertamiráns. Para participar é necesario inscribirse previamente. O prazo de inscrición estará aberto ata o 11 de novembro. Hai que enviar a ficha de inscrición ao enderezo de correo electrónico auladanatureza@concellodeames.gal
Luns, 31 de outubro de 2022
A II edición da Feira do Monte “Tanto monte, monte tanto” pechouse este sábado na parroquia de Trasmonte, en Ames, cun gran éxito de público e de participación. A cita, que contou coa presenza do alcalde Blas García, do concelleiro de Transición Ecolóxica e Medio Ambiente, Manuel Lens, e do vicepresidente da Deputación de A Coruña, Xosé Regueira, acadou unha vez máis o seu obxectivo de por en valor os oficios ligados ao monte, suliñando a importancia social, ambiental, cultural e económica do monte galego. A esta cita tamén asistiron varios/as concelleiros/as do grupo de goberno e dos grupos do Partido Popular e de Ciudadanos con representación na Corporación municipal. Premendo nesta ligazón podes ver unha ampla galería de fotos da II Feira do Monte.
Venres, 28 de outubro de 2022
Ames acolle este sábado, 29 de outubro, a II Feira do Monte “Tanto monte, monte tanto”. O evento, que busca recuperar os oficios ligados ao monte, celebrarase na parroquia de Trasmonte. O Concello de Ames pretende con este evento valorizar e difundir a importancia social, ambiental, cultural e económica do monte galego. A Feira presenta unha proposta ampliada respecto da primeira edición, con expositores de produtos ligados ao monte, entre outras actividades. Durante o evento realizarase unha obra colectiva de cestería natural.
Martes, 25 de outubro de 2022
A Concellaría de Medio Ambiente informa de que segue aberto o prazo para inscribirse na xornada formativa “Pragas e doenzas dos castiñeiros”, impartida por persoal do Centro de Desenvolvemento Agroforestal de Riós. Será o próximo venres 28 de outubro, de 10:00 a 14:00 horas, no local social de Piñeiro. As inscricións están abertas e poden realizarse ata este xoves, 27 de outubro, enviando un correo ao enderezo electrónico auladanatureza@concellodeames.gal.
Martes, 18 de outubro de 2022
O Concello de Ames anuncia o cambio de data da Feira do Monte “Tanto monte, monte tanto”, cuxa celebración estaba prevista para este sábado 22 de outubro. Debido ás inclemencias meteorolóxicas anunciadas, a Concellaría de Transición Ecolóxica e Medio Ambiente decidiu adiar o evento ao próximo sábado 29 de outubro. A feira celebrarse no campo da festa da parroquia de Trasmonte co obxectivo de recuperar os oficios ligados ao monte. Preme nesta ligazón para descagar o programa da Feira do Monte.
Xoves, 13 de outubro de 2022
O Concello de Ames presentou esta mañá a segunda edición da Feira do Monte “Tanto monte, monte tanto”. A feira celebrarse o próximo sábado, 22 de outubro, na parroquia de Trasmonte, co obxectivo de recuperar os oficios ligados ao monte. A presentación contou coa asistencia de Manuel Lens, concelleiro de Transición Ecolóxica e Medio Ambiente; Santiago Márquez, concelleiro do Rural e Participación Cidadá; Patricia Reboreda, técnica responsable da Aula da Natureza e Sonia Moure, técnica municipal do departamento de Turismo.
Mércores, 05 de outubro de 2022
A Concellaría de Medio Ambiente informa de que xa está aberto o prazo para inscribirse na xornada formativa “Pragas e doenzas dos castiñeiros”, impartida por persoal do Centro de Desenvolvemento Agroforestal de Riós. Será o próximo martes 11 de outubro, de 10:00 a 14:00 horas, no local social de Piñeiro. As inscricións están abertas e poden realizarse ata o 10 de outubro, enviando un correo ao enderezo electrónico auladanatureza@concellodeames.gal.
Venres, 30 de setembro de 2022
A Aula da Natureza continúa coa programación de actividades para este outono. Desta volta, abre o prazo de inscrición para as acampadas que se realizarán en dúas quendas nas instalacións da Aula no lugar de Quintáns, na Ameixenda. Poderase participar nesta actividade a fin de semana do 8 e 9 ou 15 e 16 de outubro. Estarán dedicadas ao estudo da fauna das rutas ambientais do concello de Ames. Para inscribirse nesta actividade hai que enviar a ficha de inscrición ao enderezo auladanatureza@concellodeames.gal. A programación ao completo pode consultarse premendo nesta ligazón.
Luns, 26 de setembro de 2022
A Aula da Natureza está desenvolvendo as diferentes actividades que compoñen a programación de outono. Deste xeito, para os meses de outubro e novembro ten previsto impartir a actividade “Outono de cogomelos”, que consta de tres saídas para recoller cogomelos que se realizarán os días 1 e 15 de outubro e 26 de novembro. Son tres saídas de campo para mellorar o coñecemento sobre estes apreciados fungos. Trátase dunha actividade aberta a todos os públicos. O prazo para inscribirse nesta actividade estará aberto ata o xoves 29 de setembro, ás 14.00 horas. Para inscribirse nesta actividade hai que enviar a ficha de inscrición ao enderezo auladanatureza@concellodeames.gal. A programación ao completo pode consultarse premendo nesta ligazón.
- ‹ anterior
- 10 de 23
- seguinte ›