O departamento de Xuventude do Concello de Ames informa de que o prazo para inscribirse no curso de monitores de tempo libre que se impartirá no Pazo da Peregrina durante os meses de marzo, abril e maio amplíase ata o vindeiro xoves, 2 de marzo. Dito curso ten un prezo de 172 euros e está dirixido a mozos/as maiores de 18 anos que conten co graduado en educación secundaria ou equivalente, ou ben que sexan técnicos auxiliares en formación profesional. Os interesados en participar deben cubrir a ficha de inscrición e presentala no rexistro municipal (presencialmente ou a través da Sede electrónica do Concello), xunto cunha fotocopia do seu DNI e da súa titulación académica. De non reunir quince participantes, o mínimo para o desenvolvemento das clases, o curso quedará suspendido. As bases ao completo e o calendario poden consultarse premendo nesta ligazón.

O Concello de Ames, a través do departamento de Xuventude, organiza unha nova edición do curso de monitores de tempo libre. As clases, que se impartirán no Pazo da Peregrina e na Casa da Cultura de Bertamiráns, desenvolveranse ao longo dos meses de marzo, abril e maio, durante as fins de semana e os días festivos, e en horario de 9:00 a 14:00 e de 16:00 a 21:00 horas. O curso, que ten un prezo de 172 euros, está dirixido a mozos/as maiores de 18 anos que conten co graduado en educación secundaria ou equivalente, ou ben que sexan técnicos auxiliares en formación profesional. Ofértanse 25 prazas, que se irán cubrindo por rigorosa orde de inscrición. As bases ao completo e o calendario de clases pódense consultar premendo nesta ligazón. A ficha de inscrición pódese descargar premendo aquí. 

Durante varias semanas o local de ensaio A Factoría estivo pechado ao público para executar varias melloras no local. O obxectivo foi dotalo de mellor equipamento e que sexa máis acolledor para os usuarios/as que o empregan. Realizáronse melloras en canto ao illamento exterior e equipamento interior. Despois de executar ditas melloras o local volveu abrir as súas portas para que os grupos de música poidan ensaiar. Deste xeito, A Factoría arrinca este 2023 con importantes melloras. O horario de ensaio é de luns a domingo, en horario de 10.00 a 22.00 horas. A concelleira de Xuventude e maila técnica de dito departamento visitaron o local par ver como quedou tralas melloras feitas.

A Concellaría de Xuventude do Concello de Ames propón neste mes de xaneiro unha xornada de patinaxe sobre xeo na pista situada en Matogrande (A Coruña). Será o vindeiro sábado 28, e ofrecerase servizo de autobús dende Bertamiráns e O Milladoiro. As persoas interesadas poden anotarse enviando a ficha de inscrición debidamente cumprimentada ao enderezo electrónico omix@concellodeames.gal entre o 18 e o 21 de xaneiro. As prazas son limitadas e asignaranse por orde de chegada dos correos electrónicos.