[30-01-2019] O Concello de Ames, a través do departamento de Persoal, fai público o anuncio coa constitución do tribunal e resultado da fase de concurso do proceso selectivo para a selección e contratación laboral fixa dun/dunha oficial para a sección de Obras e Servizos básicos, subgrupo C2. Convócase aos aspirantes, que non estean en posesión do Celga 3, para a realización do exame de galego, o vindeiro 5 de febreiro, ás 09:30 horas, no salón de plenos da Casa do Concello.

[29-01-2019] O Concello de Ames, a través da Concellaría de Comunicación, puxo en marcha en 2017 unha nova iniciativa no eido da información municipal. O departamento de prensa edita un xornal gratuíto denominado 94kmª. Trátase do xornal oficial do Concello de Ames, no que se abordan os temas de maior actualidade política e as actividades municipais nos 94 quilómetros cadrados do termo municipal. O novo xornal municipal dá conta á veciñanza de Ames do traballo municipal como preludio ás xuntanzas nas parroquias e núcleos urbanos. Actualmente, estanse repartindo os 10.000 exemplares do terceiro número. Premendo no enlace que está a túa dereita, baixo o apartado de descargas, poderás obter o terceiro número deste xornal.

[28-01-2019] O Club Ciclista Os Esfola Arrós, en colaboración co Concello de Ames e a empresa Team Relay, organiza o vindeiro 3 de febreiro unha proba de resistencia en bicicleta de montaña, aberta a maiores de 16 anos. O percorrido, que sairá do parque do Pedregal de Bertamiráns, consistirá nun só recorrido duns sete quilómetros, cun desnivel positivo acumulado por volta de 90 metros. O prazo de inscrición para participar na proba estará aberto ata o 29 de xaneiro ás 00.00h, e poderá realizarse a través da ligazón http://magmasports.es. Ao finalizar, entregaranse un total de 55 premios entre os e as participantes que queden nos primeiros postos das diferentes categorías.

Este xoves, 31 de xaneiro, celebrarase o pleno ordinario correspondente ao mes de xaneiro no que a Corporación municipal debaterá a aprobación inicial do crédito extraordinario 1/19 para sufragar as actuacións do exercicio 2019 incluídas no Plan Impulsa Ames da EDUSI. Outros temas que debaterá a Corporación municipal son a aprobación inicial da ordenanza de Convivencia cidadá do Concello de Ames, así como a aprobación inicial do regulamento do programa Xantar na Casa. Tamén se aprobará, se procede, a resolución das alegacións e maila aprobación definitiva da modificación do regulamento de Comedores Escolares, Bos Días Cole e Tardes divertidas, o Acordo para a estabilización do emprego temporal no Concello de Ames, e unha proposta presentada polo grupo municipal do Partido Popular. Premendo no enlace que está a túa dereita, baixo o apartado de descargas, poderás obter a convocatoria coa orde do día do pleno ordinario de xaneiro.