Esta pasada fin de semana a localidade de Logroño acolleu o Campionato de España Infantil de Karate, unha cita na que a Escola de Karate Dokkodo estivo representada por Tiago Blanco, Xián Blanco e Jadel Rodríguez. Así mesmo, a nivel técnico, o club amesán contou coa presenza de Enrique Blanco, como delegado da expedición galega, e de Adrián Seoane, que exerceu como árbitro nacional ao longo de todo o campionato.

O programa do Apego continúa coa súa ampla oferta de actividades para as crianzas amesás ao longo deste mes de abril. Desta volta, co espectáculo de contos e música “Pan con chocolate”, de María e Carme da Pontragha, que se desenvolverá o vindeiro venres 25 de abril, ás 18.00 horas, no Pazo da Peregrina de Bertamiráns. O prazo de inscrición está aberto ata o xoves día 24. Para participar, é preciso enviar un correo ao enderezo electrónico normalizacion@concellodeames.gal no que se indique o nome e apelidos das persoas asistentes, idade das crianzas e un teléfono de contacto.

Augas de Ames está de estrea. Esta mañá abriu a nova oficina do Milladoiro, que está situada no cruce da avenida de Rosalía de Castro coa rúa Viorneira, no número 56. A nova oficina está situada ao carón da estrada principal do Milladoiro, nun lugar máis visible para a veciñanza e conta cun espazo de 60 metros cadrados o que permite  dispor de varios postos de traballo e deste xeito ampliar o servizo que se estaba a prestar. O horario de atención ao público será o mesmo que o da anterior oficina, de luns a venres de 9.00 a 14.00 horas. Ademais, increméntase o persoal de atención ao público o que permite reforzar o servizo os martes os xoves. O número de teléfono da oficina é o 981 93 94 45.

O Concello de Ames vén de comezar os trámites para establecer unha ordenanza que regule a carta de “Benvida Social”, tamén coñecida en outros concellos como bautizo civil. Segundo os cálculos estimados polos servizos municipais non será ata o mes de agosto cando se poida oficiar a primeira celebración dunha cerimonia civil. Dita ordenanza estará en consulta pública durante 20 días hábiles rematando o prazo o 19 de maio. Posteriormente proporase para a súa aprobación no pleno ordinario de maio.