A concelleira de Deportes, Susana Señorís, o responsable da empresa Emesports, Ezequiel Mosquera, e o director técnico da delegación en Santiago da Federación Galega de Atletismo, Jesús Silva, presentaron esta mañá a vixésima edición da Carreira Pedestre Popular Concello de Ames, que está encadrada dentro do VII circuíto provincial de carreiras populares da Deputación da Coruña. Na presentación tamén participaron representantes dos clubs de atletismo do concello (Millaraio, Sar e Ames atletismo). Este evento deportivo desenvolverase o domingo, 20 de outubro, a partir das 10:30 horas. Contarase cun circuíto de 10 quilómetros homologado pola Real Federación Española de Atletismo. O prazo de inscrición xa está aberto e rematará o mércores 16 de outubro, ás 23.59. Na actualidade xa hai 157 persoas inscritas.

Desde o ano 2015, a Fundación INGADA realiza o Camiño da Diversidade, unha actividade educativa e de lecer que se desenvolverá o sábado, 12 de outubro, e que ten como finalidade potenciar os valores de solidariedade, compañeirismo, respeto e vida saudable.  A marcha consiste na realización conxunta dunha das etapas do Camiño de Santiago. Será, concretamente, a última etapa da Ruta Portuguesa, desde A Escravitude (Padrón) ata a Praza do Obradoiro. No Milladoiro  terá lugar unha parada para xantar e os membros da Fundación farán diversas actividades. Desde a Concellaría de Benestar Social anímase á veciñanza a participar desta actividade solidaria para visibilizar e concienciar á poboación sobre o Trastorno por Déficit de Atención e Hiperactividade  e os trastornos asociados, así como da diversidade funcional en xeral. As inscircións permanecerán abertas ata o mércores, 9 de outubro.

Unha delegación da Asociación de Alfombristas de Ames, encabezada por María José Bello, participou a finais do pasado mes de setembro na XIV Trobade de Catifaires de Catalunya, na localidade de Arbucias, en Xirona. A artista amesá achegou ao encontro a elaboración da alfombra floral “Ames, camiño de peregrinos”, na que todos os asistentes puideron comprobar a beleza da Ponte Maceira, unha das paraxes máis emblemáticas e fermosas que percorren os peregrinos na súa viaxe a Fisterra. Unha alfombra na que tamén se podía ver a Lucas Ernest René, un peregrino belga amigo persoal de María José Bello, quen xa fixo o Camiño de Santiago en dezasete ocacións. No encontro participaron un total de once entidades, sendo dúas as delegacións convidadas de fóra de Cataluña: Ames e Bueu.

Esta mañá o alcalde de Ames, José Miñones, o concelleiro de Obras, Blas García, a concelleira de Deportes, Susana Señorís, traballadores/as municipais e representantes das empresas adxudicatarias, visitaron as obras feitas na rúa Agro do Medio e do pavillón polideportivo do Milladoiro, para mellorar a accesibilidade. Na rúa Agro do Medio rebaixáronse a cota 0 o nivel das beirarrúas tanto nos pasos de peóns coma nos vaos. Tamén se colocou novo mobiliario público como bancos accesibles e unha marquesiña de autobús. No pavillón habilitouse un ascensor, reformáronse os baños e vestiarios e colocouse unha barreira metálica e con cristal na zona da bancada do pavillón. Estas obras financiadas con plans provincias tiveron un custo de 152.777 euros.