A Fundación Down Compostela celebrou este xoves, 20 de marzo, na sala Mozart do auditorio de Galicia, a gala de entrega dos XII Premios Down Compostela, cos que a Fundación recoñeceu o traballo de Marta Rodríguez Lorenzo, veciña de Ames, Seur e Antonio Rodríguez Núñez. A gala estivo presentada por Irene Rodríguez-Toubes, unha moza con trisomía 21, e mailo xornalista amesán, Diego Viaño. Por parte do Concello de Ames asistiron a concelleira de Benestar Social e Igualdade, Uxía García, e a concelleira de Promoción Económica, Ana Belén Paz. Ademais, durante a gala actuou o artista Fran Allo, tamén veciño de Ames, que presentou un tema do seu novo proxecto.

O Concello de Ames, a través da Concellaría de Benestar Social e Igualdade, organiza para este venres 14 de marzo a quinta edición da carreira da muller “Moitos camiños, mesma meta”, que se celebrará na área deportiva do Milladoiro. Trátase dunha cita deportiva lúdica e non competitiva, incluída dentro do programación conmemorativa do Día Internacional da Muller. O obxectivo da proba, que comezará ás 17:30 horas, é reivindicar os distintos atrancos aos que se ven sometidas todas as mulleres no día a día, a través dos nove obstáculos que se instalarán no circuíto. A inscrición, de balde, pode realizarse en liña premendo nesta ligazón. Neste evento familiar poden participar nenos/as de 5 anos en diante e persoas adultas, que terán que completar un percorrido de 600 metros.

O pavillón de Bertamiráns acolleu neste martes de Entroido unha nova edición do cocido dos maiores de Ames, ao que asistiron aproximadamente 700 veciños e veciñas do noso concello. Deste xeito, os maiores de 65 anos de Ames puideron gozar dunha gran xornada festiva, con música a cargo do dúo Plan B e na que degustaron o tradicional cocido galego. Tras o xantar, realizouse a entrega de premios aos mellores disfraces e tamén un sorteo de varias cestas con produtos de Entroido entre todos os asistentes. Gran parte da Corporación municipal asistiu á festa.

O Concello de Ames, a través da Concellaría de Benestar Social e Igualdade, preparou un ano máis unha programación específica de actividades con motivo do Día Internacional da Muller 2025. O propio sábado, 8 de marzo, haberá ás 11.00 horas na Casa da Cultura do Milladoiro un acto institucional no que lerá o manifesto municipal. A continuación, ás 11.30 horas, celebrarase a quinta edición ca carreira da muller “Moios camiños, mesma meta”, a través da cal se trata de visibilizar os obstáculos que as mulleres deben superar a diario. Por último, impartirase durante o mes de abril o programa “Mulleres en rede”, ques está dirixido a mulleres que se atopan nun estado de vulnerabilidade.