Actualidade
Luns, 24 de maio de 2021
O auditorio da Casa da Cultura de Bertamiráns acollerá mañá, 25 de maio, ás 17.30 horas, o espectáculo de narración oral “Arredor de Xela”, de Raquel Queizás. A actividade está dirixida a un público familiar con nenos e nenas maiores de 5 anos. Os convites, que son de balde, pódense adquirir na Billeteira electrónica do Concello de Ames.
Xoves, 13 de maio de 2021
Dentro da programación das Letras Galegas 2021, as Bibliotecas municipais de Ames organizaron dous obradoiros, dirixidos a nenas e nenos de 3º a 6º de primaria, e o espectáculo de narración oral “Arredor de Xela”, orientado á rapazada a partir dos 5 anos. Para participar no obradoiro de narración oral débense retirar os convites na billeteira electrónica. Para asistir aos obradoiros, é preciso inscribirse previamente nas bibliotecas de Bertamiráns e do Milladoiro, chamando aos números de teléfono 981 884 829 / 981 530 807 ou enviando un correo a biblioteca@concellodeames.gal
Mércores, 12 de maio de 2021
As Bibliotecas municipais de Ames recibiron dous lotes de libros de Os Bolechas, un deles titulado “Os Bolechas saben o que é a diabetes” e o outro, “Manuela é nova na escola, Medrando coa diabetes”. Con esta doazón feita pola Asociación ANEDIA, preténdese que os rapaces e rapazas se informen, dunha maneira adaptada a súa idade, sobre a diabetes. Trátase dunha ferramenta coa que visibilizar e sensibilizar. Os exemplares pódense consultar nas Bibliotecas municipais de Bertamiráns e do Milladoiro.
Mércores, 05 de maio de 2021
No marco das actividades do mes do libro, as Bibliotecas Municipais de Ames, en colaboración con cinco librarías do Concello, organizaron o Sorteo do Día de Libro en Ames. O sorteo desenvolveuse nas sedes das Bibliotecas en Milladoiro e Bertamiráns. Os 40 afortunados/as xa poden pasar a recoller os vales de 25 euros que poderán trocar por libros até o 8 de maio.
Mércores, 05 de maio de 2021
As bibliotecas municipais seguen a organizar unha serie de sesións de contacontos infantís na rede todos os mércores. Baixo o título de “Dixicontos”, os usuarios e usuarias poderán acceder a esta actividade a través da páxina de Facebook da biblioteca. Este mércores, 5 de maio, pódese ver o conto “Coco y la luna “, de Emilio Urberuaga.
Xoves, 22 de abril de 2021
O 23 de abril celébrase o Día do Libro. Con este motivo, as bibliotecas municipais do Concello de Ames veñen de organizar durante todo o mes de abril diferentes actividades. O propio Día do Libro, os eventos terán lugar no Pazo da Peregrina. Comezarase ás 17.00 horas con contacontos infantís, continuarase con obradoiros e rematarase coa entrega de premios do concurso de debuxo organizado polas bibliotecas municipais. Ademais, ás 19.00 horas, celebrarase unha actuación musical infantil, “Soñando inventei”, a cargo de María Faltri e Jorge Juncal. Trátase dun espectáculo no que a través de cancións se traballa o tema da diversidade e a igualdade de xénero. Por último, o xoves 29 de abril, ás 19.00 horas, presentarase, tamén no Pazo da Peregrina, o libro que recolle os textos gañadores do certame literario do Concello de Ames de 2020.
Mércores, 21 de abril de 2021
O acto terá lugar no Pazo da Peregrina, en Bertamiráns, este xoves 22 de abril, ás 20:00 horas, coa presenza do autor, da concelleira de Cultura, Natividade González, e do escultor e profesor na escola de arte Pablo Picasso da Coruña, Miguel Ángel Vigo Baleirón. Tomas Guerrero é un escritor de bandas deseñadas, ilustrador e animador 3D que conta historias a través de imaxes. A entrada ao acto é gratuíta e libre até completar o aforo limitado debido ás restricións pola Covid-19. Esta presentación enmárcase dentro da programación Abril, mes do libro en Ames, posta en marcha polas bibliotecas municipais.
Martes, 20 de abril de 2021
Este venres, 23 de abril, celébrase o Día do Libro. Con este motivo, as bibliotecas municipais do Concello de Ames organizaron unha programación específica para este mes de abril que inclúe actividades pra nenos/as e adulto/as. Para esta semana hai programadas varias actividades: o xoves, 22 de abril, ás 20.00h, no Pazo da Peregrina, Tomas Guerrero presenta as súas obras en banda deseñada. O venres, 23 de abril, celebrarase o Día do Libro no Pazo da Peregrina con música, contacontos e obradoiros infantís. Tamén se fará entrega do premio do concurso de debuxo sobre o libro e a lectura. O sábado, 24 de abril, na biblioteca de Bertamiráns, realizarase o obradoiro Autores con pegada.
Sábado, 17 de abril de 2021
1.300 papeletas repartiron as bibliotecas municipais de Ames entre cinco librarías de Milladoiro e Bertamiráns para que os seus clientes opten a participar nun sorteo de 40 premios de 25 euros que poderán trocar por libros. A actividade está tendo unha gran acollida entre a veciñanza amesá e valorase moi positivamente por parte dos libreiros/as. O sorteo, que da continuidade ao xa celebrado no Nadal, forma parte do conxunto de accións que as bibliotecas de Ames están levando a cabo este mes de abril para celebrar o “Mes do libro en Ames” e que inclúen obradoiros, presentacións e un concurso de debuxo.
Xoves, 15 de abril de 2021
O Pazo da Peregrina acolle este venres, 16 de abril, ás 17.30 horas, a presentación do libro “O soño de Liam”, de David Navarro Brugal. A concelleira de Cultura acompañará ao autor na presentación desta obra que fala dos soños e do espírito de superación dun rapaz afeccionado ao baloncesto. O acto encádrase dentro da programación especial que co gallo do mes do libro están levando a cabo as bibliotecas municipais de Ames.
- ‹ anterior
- 11 de 15
- seguinte ›