Un capataz e un peón formaron durante os últimos nove meses a brigada Aprol Rural do Concello de Ames, un grupo de traballo creado a través do programa de fomento do emprego no medio rural da Xunta de Galicia, coordinado pola Aula da Natureza da Concellaría de Medio Ambiente. Os dous traballadores da brigada actuaron sobre 66 camiños das parroquias de Piñeiro, Ortoño, A Ameixenda, Lens e Tapia, acondicionando unhas 5,57 hectáreas de superficie, uns 17,88 quilómetros lineais. O pasado venres, a brigada presentou os resultados da súa actuación ao alcalde de Ames, Blas García, e ao concelleiro de Medio Ambiente, Manuel Lens.

Este martes, 3 de maio, realizouse unha xuntanza no salón de plenos da Casa do Concello na que se presentou un simulacro de emerxencia por incendio forestal con perigo para o núcleo de poboación de Aldea Nova, ante unha activación do Plan especial de protección civil ante emerxencias por incendios forestais na comunidade autónoma de Galicia (PEIFOGA) en situación 1 e o paso a situación 2. O simulacro realizarase o vindeiro 19 de maio e desenvolverase nos lugares de Roxos (parroquia de Villestro, pertencente ao concello de Santiago de Compostela), e na urbanización de Aldea Nova (parroquia de Ortoño, no concello de Ames). Comezará ás 8:45 cun incendio de nivel 1 na zona de Roxos, que ao non poder ser controlado, pasará a nivel 1 chegando ao nivel 2 ao longo da mañá.

O Concello de Ames publica un ano máis o seu programa de campamentos municipais para este verán, a través do cal se ofertan 445 prazas repartidas entre 10 campamentos diferentes con estadía nocturna, que se desenvolverán en diferentes datas entre o 26 de xuño e o 3 de setembro. Este ano, coma novidade, inclúense novos destinos para ditos campamentos e increméntase o número de prazas. Organizaranse, tamén, dúas quendas para participar no campamento urbano da Aula da natureza. O prazo de preinscrición estará aberto do 19 ao 28 de abril. A preinscrición para este servizo realizarase enviando un correo electrónico a auladanatureza@concellodeames.gal para o campamento urbano e mailos campamentos de educación infantil e primaria. Para inscribirse nos campamentos de secundaria e bacharelato hai que enviar un correo electrónico a omix@concellodeames.gal. Hai que enviar o impreso de preinscrición que se pode descargar aquí.

O Concello de Ames, a través da Aula da Natureza, comeza en abril a facer o reparto do material para a mitigación da avespa velutina. O persoal do departamento de Medio Ambiente será o encargado de repartir o líquido atrainte. Ao mesmo tempo, achéganse unhas instrucións básicas sobre a colocación das trampas e a utilización do líquido atrainte. Dende o Concello farase un seguimento e avisarase, unha vez finalizado o período de trampeo, sobre a conveniencia de retirar as trampas para non danar outras especies. Dende o Concello anímase aos amesáns e ás amesás a participar nesta iniciativa, que é a maneira máis eficaz de poder controlar a vespa velutina.