A Concellaría de Mocidade continúa co programa Trouleando coa súa cuarta proposta do ano, unha saída a un circuíto de actividades inspirado no programa “Humor Amarillo”. Será o próximo sábado 30 de abril, con servizo de autobús dende o Milladoiro e Bertamiráns. As persoas interesadas poden inscribirse enviando esta ficha de inscrición cumprimentada ao enderezo electrónico omix@concellodeames.gal, entre o martes 19 e o venres 22 de abril.  As prazas asignaranse por orde de chegada e están abertas á mocidade a partir dos 12 anos (nada no 2009).

Esta mañá a biblioteca de Bertamiráns acolleu a presentación do cómic O misterio das pintadas invisibles, creado por Tomás Guerrero con motivo do 8M. Esta banda deseñada é froito da colaboración entre as Bibliotecas municipais e mailo departamento de Mocidade. Editáronse 1.600 exemplares desta banda deseñada. Unha parte dos cómics serán repartidos entre todo o alumando que cursa estudos de primeiro a cuarto da ESO do IES de Ames, en Bertamiráns, e do IES do Milladoiro. Outros 300 exemplares repartiranse nas bibliotecas entre as usuarias/os que estean interesadas. Esta actividade enmárcase dentro da programación elaborada con motivo do 8M.

A Concellaría de Mocidade organizou esta fin de semana unha viaxe á estación de invernal de Leitariegos, situada na comarca do Val de Laciana, en León, na que 36 mozos e mozas puideron desfrutar do deporte e da natureza. A excursión, financiada parcialmente pola Concellaría, incluíu desprazamento en autobús, aloxamento e pensión completa, así como acceso ás pistas de esquí, a material e a clases, acompañados por un equipo de monitores. Na saída participaron persoas dos 15 aos 30 anos.

A Concellaría de Mocidade organiza unha saída á estación invernal de Leitariegos, na provincia de León, para persoas de Ames de entre 15 (nados en 2006) e 30 anos. A viaxe terá lugar entre o venres 18 e o domingo 20 de febreiro, cun custe de 150 euros que inclúe desprazamento en autobús, aloxamento, comidas e todas as facilidades para practicar esquí. Nos casos de emerxencia social, a actividade quedará exenta desta taxa. O prazo de inscrición estará aberto unha semana, dende o martes 18 ata o 25 de xaneiro. As prazas adxudicaranse por orde de chegada ás persoas que presenten a seguinte solicitude e a documentación necesaria nos rexistros municipais, preferiblemente a través da sede electrónica do Concello de Ames.