O Concello de Ames oferta para o primeiro semestre de 2025 unha programación de artes escénicas composta por un total de 13 obras, de teatro, danza e circo, dirixidas para público adulto e infantil. Unha das actuacións será a da peza teatral "O único que verdadeiramente quixen toda a vida é ser delgada", da compañía Butacazero, que se representará o 4 de abril, ás 20.30 horas, no auditorio da Casa da Cultura do Milladorio. As entradas poden adquirirse na Billeteira electrónica a partir do 8 de xaneiro.

O Concello de Ames, a través da Concellaría de Cultura, desenvolve, un ano máis, o programa cultural Abril de Cine no que a veciñanza poderá gozar ao longo de todo o mes de diferentes propostas de cinema galego. Desta volta, todos os filmes teñen un mesmo nexo en común: o desarraigamento. Esta edición estará composta por tres sesións; nas dúas primeiras proxectaranse longametraxes en formato documental e na última das citas, exhibiranse catro curtametraxes de temáticas e formatos moi amplos, como a comedia filosófica ou, de novo, o formato documental. Todas as sesións se desenvolverán ás 20.00 horas no Auditorio da Casa da Cultura do Milladoiro.