Pestanas principais

Departamento de urbanismo

    • Enderezo: Alcalde Lorenzo, nº 2, Bertamiráns.
    • Teléfono: 981 88 30 02
    • Horario de atención ao público:
        • De luns a venres, en horario das 9:00 ás 14:00 horas.
    •  Responsable municipal: Concellaría de Urbanismo
Outros Datos: 

Novas do departamento

O Concello de Ames volve a solicitarlle á Xunta de Galicia a retirada do valado para poder realizar as obras de urbanización do centro de saúde do Milladoiro

Este luns, 18 de maio, a Consellería de Infraestruturas mantivo unha xuntanza por videoconferencia cos responsables do equipo director das obras de construción do centro de saúde de Milladoiro. A dita xuntanza non se invitou a ningún representante do Concello de Ames, nin do grupo de goberno nin técnico municipal, de cara a poder expoñer o punto de vista da Administración local. Para o goberno de Ames “é unha mostra máis de deslealdade institucional á que nos ten acostumada a Xunta de Galicia”.

O Concello pon a disposición das empresas un impreso para que soliciten superficie no futuro parque empresarial en Bertamiráns

O Concello de Ames, a través da Concellaría de Urbanismo, avanza no desenvolvemento do polígono industrial de Bertamiráns. Para iso está solicitada unha xuntanza coa conselleira de Economía e Industria, María Jesús Lorenzana, para analizar a creación de dito parque empresarial. Ademais, o Concello pon a disposición das empresas un impreso para que acheguen información sobre a superficie que estarían interesadas en ocupar en dito polígono. Con dita información crearase unha relación de empresas interesadas. O novo parque empresarial estará situado no lugar de Caroubáns, próximo á rotonda que dá acceso á estrada AC-544, Bertamiráns – Negreira, e contará cunha extensión de máis de 300.000 metros cadrados. Dende esta zona tería conexión directa coa autovía AG-56 Santiago – Brión. Premendo nesta ligazón podes descargar o impreso de demanda de solo industrial no concello de Ames.

O Concello presenta alegacións ao proxecto de explotación de servizos públicos de transporte metropolitano solicitando máis frecuencias nas liñas existentes, novas liñas e a creación dunha liña nocturna

O Concello de Ames, a través da Concellaría de Mobilidade, vén de presentar ante a Consellería de Infraestruturas e Mobilidade, da Xunta de Galicia, alegacións ao proxecto de explotación de servizos públicos de transporte regular de viaxeiros de uso xeral por estradas. As alegacións presentadas céntranse en seis liñas de transporte: ruta da rúa da Rosa - Bertamiráns – A Gándara; ruta da rúa da Rosa – Ameneiro – Casalonga – Firmistáns; ruta da rúa da Rosa – O Milladoiro; ruta polígono Novo Milladoiro – Bertamiráns; e ruta da rotonda de As Viñas - rúa da Rosa. Ademais, proponse para as fins de semana, a creación dunha liña nocturna con parada segura que sexa circular Bertamiráns – O Milladoiro – rúa da Rosa, comezando ás 23:30h con dúas frecuencias de primeira hora e dúas de volta ás 3:00 e 4:00 horas.

O Concello presenta o proxecto de humanización do entorno das rúas Madalena, Estivada de Castelao e das Camelias, no Milladoiro

O Goberno municipal presentou esta mañá o proxecto de humanización da contorna das rúas Madalena, Estivada de Castelao e das Camelias, integrando a praza da Madalena, o parque de Estivada de Castelao e mailos espazos públicos que lindan coas mesmas. O proxecto, constará de varias fases. A primeira, a expropiación do inmoble situado na rúa da Madalena número 6, está vinculada ao Ames Progresas 2021 – 2023. Posteriormente procederase ao seu derribo e, por último, licitarase o proxecto de execución das obras de reurbanización das prazas e rúas desta zona do Milladoiro. O principal obxectivo do proxecto é buscar un deseño que sexa comprensible, utilizable e accesible por todos os usuarios, garantindo a seguridade e comodidade dos mesmos. Premendo nesta ligazón podes consultar un vídeo explicativo do proxecto.

O desvío do tráfico pesado na avenida de Rosalía de Castro logra reducir nun 11% os niveis altos de ruído e a emisión de 41 toneladas de CO2 á atmosfera

Dende o pasado 12 de decembro de 2018 os vehículos pesados teñen prohibido circular pola avenida de Rosalía de Castro que cruza a localidade do Milladoiro. Ademais, neste mes de febreiro cúmprense dous anos da colocación de sinais na AG-56 e no corredor AC-522 que proporcionan información sobre a ruta alternativa de circulación para non atravesar O Milladoiro. Deste xeito, durante estes dous anos, que leva vixente o desvío de tráfico pesado pola avenida de Rosalía de Catro, eliminouse o paso de preto de 200.000 camións, unha media de 280 camións ao día. Isto permitiu reducir o ruído que soporta a veciñanza así como as emisións de CO2 e polo tanto a contaminación no núcleo urbano desta localidade.

O goberno aproba na Xunta de Goberno Local desta semana o estudo de detalle das novas parcelas do Rego dos Pasos Sur II que se atopan xunto ao paseo fluvial

O departamento de Urbanismo do Concello de Ames vén de emitir informe favorable ao documento de estudio de detalle das parcelas R4-R5 do APE PB7-04 “Rego dos Pasos Sur II”, unha vez subsanada a documentación requirida desde o Concello o pasado 30 de agosto de 2019. A aprobación deste expediente permitirá seguir coa tramitación para o desenvolvemento de novas edificacións xunto ao paseo fluvial e o desenvolvemento dunha zona en expansión na localidade de Bertamiráns.

O Goberno municipal reúnese co Ministerio de Fomento para abordar a humanización da avenida de Rosalía de Castro do Milladoiro

O alcalde de Ames, Jose Miñones, mantivo esta semana unha xuntanza telemática co Secretario Xeral de Infraestruturas, Sergio Vázquez Torrón e o Director Xeral de Estradas, Javier Herrero Lizano do Ministerio de Fomento. Nesta reunión acordouse que o Ministerio de Fomento redactará o proxecto de modificación da rotonda que dá acceso ao Milladoiro en base ao documento xa existente. Ao longo deste ano buscarase financiamento para este proxecto de cara a poder executalo. A idea é levar a cabo unha actuación que permita o acceso directo ao polígono desde a SC-20, así como de saída desde o núcleo urbano cara Santiago. Este proxecto realizarase en coordinación coa empresa INOR (Ingeniería del Noroeste), que está elaborando o proxecto de humanización da avenida de Rosalía de Castro. Ademais, abordouse a posible transferencia da avenida de Rosalía de Castro ao Concello de Ames.

O Goberno municipal reúnese coa xunta directiva da Asociación de empresarios do parque empresarial Novo Milladoiro

O alcalde de Ames, Blas García, xunto cos concelleiros de Urbanismo, Víctor Fernández, de Obras e Servizos Básicos, Gustavo Nieto, e da concelleira de Promoción Económica, Ana Belén Paz, mantiveron unha xuntanza co presidente, Javier Santos, e outros representantes da xunta directiva da Asociación de empresarios do parque empresarial Novo Milladoiro para informar das actuacións relativas á humanización da N-550, así como do ramal de acceso ao polígono correspondente á mellora da intersección da estrada SC-20, PK 10+350 coa estrada N-550 PK 67+150, que foi aprobado definitivamente polo Ministerio de Transportes, Mobilidade e Axenda Urbana no pasado mes de outubro.

O Goberno municipal visita en Biduído a construción da primeira “passivhaus” de Galicia con piñeiro autóctono

O pasado xoves 31 de marzo, varios representantes do Concello de Ames desprazáronse ata Biduído de Arriba, na parroquia de Biduído, para visitar as obras da primeira vivenda construída con piñeiro galego baixo o estándar de construción “passivhaus” (casa pasiva en alemán). Estes inmobles contan cunha alta capacidade de illamento, que permiten aforrar ata un 75 por cento do consumo enerxético en calefacción e refrixeración. Ademais, para esta edificación recorreuse a madeira certificada co selo de calidade Pino de Galicia, nunha aposta pola construción sustentable e a industria forestal galega.

O Ministerio de Transportes, Mobilidade e Axenda Urbana investirá 7,88 millóns de euros para humanizar a N-550 ao seu paso polo Milladoiro

A secretaria de Estado de Transportes, Mobilidade e Axenda Urbana, Isabel Pardo de Vera, e o delegado do Goberno en Galicia, José Miñones, visitaron hoxe o concello de Ames, onde anunciaron a inclusión da obra de humanización da avenida Rosalía de Castro, no Milladoiro, nos investimentos do Plan de Recuperación, Transformación e Resiliencia. Reuníronse co alcalde de Ames, Blas García, a quen lle avanzaron esta decisión que impulsará esta obra, longamente demandada pola Corporación municipal e por toda a poboación do Milladoiro, e na que o Ministerio de Transportes, Mobilidade e Axenda Urbana investirá 7,88 millóns de euros.